COVID-19
កីឡាអន្តរជាតិ
អន្តរជាតិ
មន្ត្រីអូឡាំពិកជប៉ុន៖ អូឡាំពិកក្រុងតូក្យូដំណើរការបាន អាស្រ័យលើការគាំទ្ររបស់អាមេរិក
× ការប្រកួតកីឡាអូឡាំពិកក្រុងតូក្យូឆ្នាំ ២០២០ ដែលគ្រោងចាប់ផ្តើមនៅខែកក្កដា ឆ្នាំ២០២១ ធ្វើទៅបានអាស្រ័យលើការគាំទ្រពីអាមេរិកដែលមានលោក ចូ បៃឌិន ជាប្រធានាធិបតីថ្មី។ នេះជាសម្តីលោក Haruyuki Takahashi សមាជិកគណៈកម្មាធិការរៀបចំអូឡាំពិកក្រុងតូក្យូ (TOC) ដែលកាសែត Wall Street Journal ដកស្រង់មកផ្សាយ។
គណៈកម្មាធិអូឡាំពិកអន្តរជាតិ (IOC) និងអ្នករៀបចំព្រឹត្តិការណ៍កីឡាជប៉ុននៅតែមានការប្តេជ្ញាចិត្តរួមគ្នាក្នុងការបន្តរៀបចំព្រឹត្តិការណ៍អូឡាំពិករដូវក្តៅ ដ្បិតមានការកើនឡើងករណីឆ្លង COVID-19 ក៏ដោយ។ ទោះបីមានការអះអាងពី IOC និងម្ចាស់ផ្ទះជប៉ុនបែបនេះក្តី តែលោក Takahashi សមាជិក TOC គិតថា អនាគតអូឡាំពិកអាចពឹងផ្អែកលើការគាំទ្ររបស់ប្រធានាធិបតីអាមេរិក ចូ បៃឌិន ជាចាំបាច់។
សមាជិក TOC រូបនេះ បានប្រាប់កាសែត WSJ ដែលបានចេញផ្សាយនៅថ្ងៃទី២៧ ខែមករាថា៖ «លោកបៃឌិន កំពុងប្រឈមមុខនឹងស្ថានភាពដ៏លំបាកជាមួយ COVID-19។ ប៉ុន្តែប្រសិនបើគាត់ធ្វើសេចក្តីថ្លែងការណ៍វិជ្ជមានជុំវិញដំណើរការអូឡាំពិក យើងនឹងទទួលបានសន្ទុះគាំទ្រកាន់តែខ្លាំងក្លា»។
លោក Takahashi ដែលមានវ័យ៧៦ឆ្នាំបន្ថែមទាំងមុតមាំថា អូឡាំពិកក្រុងតូក្យូដំណើរការទៅបានក៏អាស្រ័យលើការគាំទ្ររបស់ភាគីអាមេរិកដែរ ហើយលោក Thomas Bach ប្រធាន IOC រួមទាំងស្ថាប័ន IOC ផ្ទាល់ ក៏មិនមែនជាបុគ្គលដែលអាចសម្រេចចិត្តជុំវិញព្រឹត្តិការណ៍កីឡានេះបានដែរ។
ចាប់តាំងពី បៃឌិន ក្លាយជាប្រធានាធិបតីអាមេរិកទី៤៦ កាលពីសប្តាហ៍មុន លោកមិនបាននិយាយអ្វីជាសាធារណៈពាក់ព័ន្ធនឹងកីឡាអូឡាំពិកដែលជប៉ុនដឹកនាំធ្វើម្ចាស់ផ្ទះនៅឡើយទេ។ ក្រុមអ្នករៀបចំអូឡាំពិកជប៉ុន ចង់ឱ្យលោកបៃឌិនគាំទ្រដំណើរការនេះ ប៉ុន្តែអ្នកនាំពាក្យសេតវិមានលោកស្រី Jen Psaki ដែលត្រូវបានគេសួរជាច្រើនដងថា តើប្រធានាធិបតីគិតថាអូឡាំពិកដែលគ្រោងចាប់ផ្តើមនៅខែកក្កដា នឹងមានសុវត្ថិភាពដែរឬទេនោះ មិនបានផ្តល់ចម្លើយអ្វីឡើយ។ ក្រោយមក លោកស្រី Psaki បន្តប្រាប់អ្នកព័ត៌មានថាលោកស្រីមិនបាននិយាយជាមួយលោក បៃឌិន ជុំវិញព្រឹត្តិការណ៍អូឡាំពិកក្រុងតូក្យូនេះនៅឡើយទេ៕
© រក្សាសិទ្ធិដោយ thmeythmey.com