អន្តរជាតិ
បម្រែបម្រួលអាកាសធាតុ៖ ចិនថា ត្រៀមខ្លួនជាស្រេចដើម្បីកិច្ចសហប្រតិបត្តិការជាមួយអាមេរិក
អ្នកនាំពាក្យក្រសួងការបរទេសចិន Zhao Lijian ។ រូបថតពីក្រសួងការបរទេសចិន
×![]()
ដោយ: តន ចាន់រិទ្ធារ៉ា
ទីក្រុងប៉េកាំង បានឆ្លើយតបជាវិជ្ជមានទៅនឹងបំណងរបស់រដ្ឋបាលអាមេរិកថ្មីក្នុងការរួមគ្នាប្រយុទ្ធនឹងបម្រែបម្រួលអាកាសធាតុ។ អ្នកនាំពាក្យក្រសួងការបរទេសចិន នៅថ្ងៃទី២៨ ខែមករា និយាយថា ចិនត្រៀមខ្លួនជាស្រេចដើម្បីកិច្ចសហប្រតិបត្តិការជាមួយអាមេរិក និងស្នើឱ្យអាមេរិកបង្កើតបរិយាកាសសមស្រប សំដៅដោះស្រាយបញ្ហាប្រឈមជាសាកលមួយនេះ និងបញ្ហាសំខាន់ៗផ្សេងទៀត។
ទាំងរដ្ឋមន្ត្រីការបរទេសថ្មី អាន់តូនី ប្ល៊ីងខិន ទាំងប្រេសិតប្រធានាធិបតីទទួលបន្ទុកបញ្ហាបម្រែបម្រួលអាកាសធាតុ ចន ឃែរី សុទ្ធតែបានប្រកាសជំហរដូចគ្នាក្នុងការត្រៀមធ្វើការជាមួយចិនលើបញ្ហាអាកាសធាតុនេះ ទោះជាមហាអំណាចទាំងពីរជាគូប្រជែងក្ដី។ លោក ឃែរី ថែមទាំងនិយាយថា លោកនឹងមិនឱ្យការខ្វែងគំនិតគ្នាលើបញ្ហាដទៃ មកប៉ះពាល់កិច្ចការនេះឡើយ។
នាសន្និសីទសារព័ត៌មានប្រចាំថ្ងៃទី២៨ ខែមករា លោក Zhao Lijian អ្នកនាំពាក្យក្រសួងការបរទេសចិន ក៏ត្រូវបានសួរពីជំហររបស់ចិនពាក់ព័ន្ធរឿងនេះ។ លោក Zhao ឆ្លើយថា បម្រែបម្រួលអាកាសធាតុជាបញ្ហារួមរបស់ប្រទេសទាំងអស់ និងជាក្ដីបារម្ភដែលប៉ះពាល់អនាគតរបស់មនុស្សជាតិ។ លោកបន្ថែមថា ហេតុនេះ ការដោះស្រាយបញ្ហានេះ ត្រូវការសកម្មភាពជាសាកល ការឆ្លើយតបសាកល និងកិច្ចសហប្រតិបត្តិការសាកលជំនួសឱ្យសកម្មភាពប្រទេសមួយៗ។
«ចិនត្រៀមរួចរាល់ដើម្បីសហការជាមួយអាមេរិក និងសហគមន៍អន្តរជាតិលើបញ្ហាបម្រែបម្រួលអាកាសធាតុ។» នេះជាការបញ្ជាក់របស់លោក Zhao ក្រោយពីអះអាងថា ចិន និងអាមេរិកមានផលប្រយោជន៍រួមជាច្រើន និងមានឱកាសធ្វើការជាមួយគ្នាជាច្រើនដែរ។ អ្នកនាំពាក្យខាងលើ ក៏ឆ្លៀតរំឭកពីកិច្ចសហប្រតិបត្តិការរួមគ្នាកន្លងមកលើបញ្ហាប្រឈមមួយនេះតួយ៉ាងការជំរុញការចរចា ការចុះហត្ថលេខា និងការអនុវត្តកិច្ចព្រមព្រៀងបម្រែបម្រួលអាកាសធាតុឆ្នាំ២០១៥ ។
ទោះជាយ៉ាងណាមិញ មន្ត្រីក្រសួងការបរទេសចិនរូបនេះ ក៏ប្រាប់ឱ្យអាមេរិកបង្កើតបរិយាកាសសមស្របដើម្បីកិច្ចសហប្រតិបត្តិការ និងការសម្របសម្រួលជាមួយចិន។ លោក Zhao រំឭកថា ប្រទេសណាមួយ មិនគួរស្រមៃសុំកិច្ចសហប្រតិបត្តិការជាមួយចិន ឬការគាំទ្ររបស់ចិនទាំងទ្វេភាគី ទាំងពហុភាគី នៅពេលប្រទេសនោះលូកដៃចូលកិច្ចការផ្ទៃក្នុងចិន ហើយបំពានប្រយោជន៍ចិន។
កិច្ចសហប្រតិបត្តិការលើវិស័យអាកាសធាតុនេះ ទំនងជាអាចប្រធានដែលមហាអំណាចទាំងអស់អាចធ្វើការជាមួយគ្នាបាន។ ប្រធានាធិបតីទើបចូលកាន់តំណែង ចូ បៃឌិន ក៏និយាយរួចហើយថា អាមេរិកចង់បានការចូលរួមជាអន្តរជាតិលើបញ្ហាសាកល បើទោះជាលោកមិនបន្ធូរដៃឱ្យចិនលើរឿងផ្សេងទៀតក្ដី៕
Tag:
ចិន
អាមេរិក
បម្រែបម្រួលអាកាសធាតុ
© រក្សាសិទ្ធិដោយ thmeythmey.com
