COVID-19
ជាតិ
×![]()
ភ្នំពេញ៖ សម្ដេច ហ៊ុន សែន នឹងចាក់វ៉ាក់សាំងកូវីដ-១៩ នៅថ្ងៃទី១០ កុម្ភៈ នាមន្ទីរពេទ្យកាល់ម៉ែត្រ។ ចិននឹងផ្ដល់វ៉ាក់សាំង៦០ម៉ឺនដូសមកកម្ពុជា នៅថ្ងៃទី៧ កុម្ភៈ។ នេះបើតាមសារសំឡេងរបស់សម្ដេច ហ៊ុន សែន ដែលបានចែកចាយតាមបណ្ដាញតេឡេក្រាម នៅថ្ងៃទី៤ កុម្ភៈ។
សម្ដេច ហ៊ុន សែន នឹងទៅទទួលវ៉ាក់សាំងSinopharmរបស់ចិន នៅព្រលានយន្តហោះផ្ទាល់តែម្ដង។កន្លងមកនាយករដ្ឋមន្ត្រី ហ៊ុន សែន បានអះអាងថា កម្ពុជាទទួលយកវ៉ាក់សាំងពីគ្រប់បណ្ដាប្រទេសទាំងអស់ ដោយមិនប្រកាន់ជំហរនយោបាយការបរទេសឡើយ។ ក្នុងន័យនេះ ប្រមុខរដ្ឋាភិបាល ក៏បានបញ្ជាក់ថា កម្ពុជា នឹងទទួលបានវ៉ាក់សាំងពីចិន១លានដូស។ ប៉ុន្តែចិននឹងផ្ដល់វ៉ាក់សាំង៦០ម៉ឺនដូសសិន មកកម្ពុជា នៅខែកុម្ភៈនេះ សម្រាប់ប្រើប្រាស់ចាក់លើប្រជាពលរដ្ឋ។
ក្រៅពីចិន កម្ពុជាក៏នឹងទទួលបានវ៉ាក់សាំងពីអូស្ត្រាលី ប្រមាណ៣លានដូសដែរ តាមរយៈជំនួយជាថវិកា២៨លានដុល្លារអាមេរិក។ សម្រាប់វ៉ាក់សាំងពីអូស្ត្រាលីនេះ គឺកម្ពុជាចាក់លើពលរដ្ឋ១,៥លាននាក់។
រីឯ COVAX ក៏នឹងផ្ដល់វ៉ាក់សាំង៧លានដូស មកម្ពុជា សម្រាប់ប្រើប្រាស់លើមនុស្ស៣,៥លាននាក់ដែរ នៅក្នុងអំឡុងខែមីនា។ សម្ដេច ហ៊ុន សែន ក៏បានសរសេរលិខិតស្នើជំនួយវ៉ាក់សាំងទៅរដ្ឋាភិបាលឥណ្ឌា និងរុស្ស៊ីរួចហើយ ខណៈរដ្ឋាភិបាលកំពុងពិចារណាលើការទិញវ៉ាក់សាំងពីអង់គ្លេសមួយទៀត។ វ៉ាក់សាំងអង់គ្លេសនេះ តម្លៃ៤ ឬ៥ដុល្លារប៉ុណ្ណោះ ស្របពេលវ៉ាក់សាំងចិន មានតម្លៃ២០ដុល្លារ។
បើតាមការគ្រោងទុកនេះ កម្ពុជានឹងទទួលបានជំនួយវ៉ាក់សាំង១១លានដូស ស្របពេលកម្ពុជាត្រៀមទិញវ៉ាក់សាំង២០លានដូស សម្រាប់មនុស្ស១០លាននាក់៕
© រក្សាសិទ្ធិដោយ thmeythmey.com
