COVID-19
អន្តរជាតិ
COVAX ប្រមូលបានវ៉ាក់សាំងកូវីដ-១៩ ជាង៣០០លានដូសដើម្បីចែកឱ្យប្រទេសក្រីក្រ រូបថត Xinhua
×
ដោយ ឈួន ឈីវអ៊ីង
យន្តការ COVAX ប្រមូលបានវ៉ាក់សាំងកូវីដ-១៩ ជាង៣០០លានដូសសម្រាប់ដឹកទៅកាន់បណ្ដាប្រទេសក្រីក្រ។ នេះបើតាមការប្រកាសរបស់ទីភ្នាក់ងារ GAVI ដែលដឹកនាំយន្តការនេះនៅថ្ងៃទី៣ ខែកុម្ភៈ។ វ៉ាក់សាំងទាំងនេះ បូកបញ្ចូលវ៉ាក់សាំងដែល COVAX នឹងទទួលបាននៅពេលបន្តបន្ទាប់ ត្រូវរំពឹងថា នឹងចែកចាយឱ្យប្រទេសនានាអំឡុងឆមាសទីមួយឆ្នាំ២០២១ នេះ។
ក្នុងផែនការរបស់ខ្លួន COVAX គ្រោgចែកចាយវ៉ាក់សាំងសម្រាប់ប្រជាជនប្រមាណ៣,៣ ភាគរយនៃចំនួនប្រជាជនសរុបក្នុងប្រទេសចំនួន ១៤៥ ដែលចូលរួមក្នុងការទទួលវ៉ាក់សាំងជុំដំបូង។ សម្រាប់វ៉ាក់សាំងដែលប្រមូលបាននេះ មានវ៉ាក់សាំងរបស់ក្រុមហ៊ុន AstraZeneca ចំនួន ២៤០លានដូស ដែលត្រូវបានផលិតដោយ វិទ្យាស្ថាន Serum របស់ឥណ្ឌា, វ៉ាក់សាំងផលិតដោយ AstraZeneca ផ្ទាល់ប្រមាណ៩៦លានដូស និងវ៉ាក់សាំង១,២លានដូសទៀតរបស់ក្រុមហ៊ុន Pfizer ។
«ពួកយើងនឹងអាចចាប់ផ្តើមចែកវ៉ាក់សាំងជួយសង្គ្រោះជីវិតមនុស្សជាសកលក្នុងពេលឆាប់ៗនេះ។» នេះជាការលើកឡើងរបស់អគ្គនាយកប្រតិបត្តិរបស់ក្រុមសម្ព័ន្ធវ៉ាក់សាំង GAVI លោក Seth Berkley ក្នុងសន្និសីទសារព័ត៌មានមួយថ្ងៃទី៣ ខែមករា។ GAVI ជាសហប្រធាន COVAX ជាមួយអង្គការសុខភាពពិភពលោក និងអង្គការ UNICEF ជាដើម។
ទាក់ទងរឿងចែកចាយវ៉ាក់សាំងនេះ មន្ត្រីរបស់អង្គការសុខភាពពិភពលោក លោកស្រី Ann Lindstrand លើកឡើងថា នៅដំណាក់កាលដំបូង វ៉ាក់សាំងកូវីដ-១៩ គួរទៅដល់ប្រទេសគោលដៅនៅចុងខែកុម្ភៈនេះ ឬដើមខែមីនា។ លោកស្រី បញ្ជាក់ថា អាហ្វ្រិកខាងត្បូង កាប់វែរ និង រ៉វ៉ាន់ដា អាចនឹងទទួលបានវ៉ាក់សាំង Pfizer មុនគេក្នុងចំណោមប្រទេសអាហ្វ្រិក។
យ៉ាងណាមិញ គម្រោងរបស់ COVAX ក្នុងការផ្ដល់វ៉ាក់សាំងទៅបណ្ដាយប្រទេសក្រីក្រ ក៏ជួបបញ្ហារាំងស្ទះ ពិសេសចំនួនវ៉ាក់សាំងនៅមានកំណត់នៅឡើយ។ កាលពីសប្ដាហ៍មុន សហភាពអឺរ៉ុប បានចេញការរឹតត្បិតការនាំចេញវ៉ាក់សាំងដែលផលិតនៅប្រទេសអឺរ៉ុប សំដៅធានាការផ្គត់ផ្គង់បណ្ដាប្រទេសអឺរ៉ុប៕
© រក្សាសិទ្ធិដោយ thmeythmey.com