កីឡាអន្តរជាតិ
អន្តរជាតិ
ប្រធានអូឡាំពិកក្រុងតូក្យូ សុំទោសដែលរើសអើងស្ត្រី តែមិនចុះចេញតាមការទាមទារឡើយ
× លោក Yoshiro Mori ប្រធានព្រឹត្តិការណ៍កីឡាអូឡាំពិកក្រុងតូក្យូឆ្នាំ ២០២០ បានសុំទោសចំពោះការអត្ថាធិប្បាយមិនសមរម្យរបស់លោកពាក់ព័ន្ធនឹងស្ត្រី ដែលប្រឆាំងនឹងស្មារតីអូឡាំពិក។ ដោយសារករណីនេះ មានការអំពាវនាវឱ្យ Mori ចុះចេញពីតំណែងពេញបណ្តាញសង្គម ប៉ុន្តែលោកថាមិនលាលែងនោះទេ។
«Mori សូមមេត្តាលាឈប់ទៅ» ត្រូវបានបង្ហោះនៅពេញបណ្តាញសង្គម Twitter ក្នុងប្រទេសជប៉ុន ដោយអ្នកប្រើប្រាស់ទាំងនោះអំពាវនាវដល់អ្នកឧបត្ថម្ភដើម្បីដាក់សម្ពាធដល់គណៈកម្មាធិការរៀបចំកីឡាអូឡាំពិកក្រុងតូក្យូបញ្ចប់តំណែងលោក Mori តែម្តង។
បញ្ហានេះកើតឡើង បន្ទាប់ពីប្រធានកីឡាអូឡាំពីវ័យ៨៣ឆ្នាំរូបនេះ បង្ហាញពីការរើសអើងភេទនៅក្នុងកិច្ចប្រជុំក្រុមប្រឹក្សាគណៈកម្មាធិការអូឡាំពិកជប៉ុន (JOC) នៅសប្តាហ៍នេះ។ នេះបើយោងតាមការចុះផ្សាយរបស់កាសែត Asahi។ កាសែតដដែលនេះ អះអាងថាលោក Mori បាននិយាយទៅកាន់សមាជិកក្រុមប្រឹក្សាភិបាលស្ត្រីថា«និយាយច្រើនពេក»។
«ប្រសិនបើយើងបង្កើនចំនួនសមាជិកក្រុមប្រឹក្សាភិបាលស្ត្រី យើងត្រូវតែប្រាកដថាពេលវេលាក្នុងការនិយាយរបស់ពួកគាត់ត្រូវកម្រិតខ្លះ ដ្បិតពួកគេមានការលំបាកក្នុងការបញ្ចប់ដែលនោះជាការរំខាន»។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
យ៉ាងណាក៏ដោយ ប្រធានរៀបចំកីឡាអូឡាំពិកក្រុងតូក្យូឆ្នាំ ២០២០ ដែលត្រូវពន្យារទៅឆ្នាំ២០២១ ទទួលស្គាល់ថាការអត្ថាធិប្បាយរបស់ខ្លួនពិតជាមិនសមរម្យឡើយ ហើយជាទង្វើដែលប្រឆាំងនឹងស្មារតីអូឡាំពិកទៀតផង។ លោក Mori ថែមទាំងអះអាងប្រាប់អ្នកសារព័ត៌មានថាលោកមិនគិតពីការលាឈប់ពីតំណែងដោយសារតែករណីនេះឡើយ៕
Tag:
Yoshiro Mori
Olympic
© រក្សាសិទ្ធិដោយ thmeythmey.com