លោក ហាវ បាក់ឃន គឺជាស្ថាបត្យករវ័យក្មេងនៅសសរ។ ស្ថាបត្យកម្មរូបនេះ បាននិយាយថា ស្ថាបត្យកម្ម កាន់តែមានតួនាទីសំខាន់ នៅក្នុងកិច្ចការពារបរិស្ថាន នៅក្នុងសង្គមអភិវឌ្ឍន៍។ លោក ហាវ បាក់ឃន បញ្ជាក់ដូច្នេះ៖«ខ្ញុំយល់ថា នៅពេលណា ដែលសង្គមមានការរីកចម្រើន ស្ថាបត្យកម្មក៏ ដើរតួយ៉ាងសំខាន់ ក្នុងការចូលរួមចំណែកក្នុងការការពារនិងការយល់ដឹងអំពីបរិស្ថានផងដែរ»។
នៅក្នុងប្រទេសកំពុងអភិវឌ្ឍដូចជាប្រទេសកម្ពុជា ដែលមានការសាងសង់អគារខ្ពស់ៗ អគារខុនដូ គេហដ្ឋាន ការិយាល័យ និងហាងជាច្រើន កំពុងតែលេចចេញជារូបរាងឥតឈប់ឈរ នៅគ្រប់ទិសទី ពីមួយឆ្នាំទៅមួយឆ្នាំ។ ដូច្នេះ វាពិតជាមានសារៈសំខាន់ណាស់ ដែលរាល់សំណង់អាគារទាំងអស់នោះ គប្បីរចនាឡើង ដោយមានការបញ្ចូលបណ្តុំគំនិត នៃការការពារ និងយល់ដឹងអំពីបរិស្ថាន ដែលប្រកបដោយនិរន្តរភាព ពីព្រោះវាអាចជួយកាត់បន្ថយការប្រើប្រាស់ថាមពល និងធ្វើឱ្យមានភាពប្រសើរឡើង នូវសុខភាពសាធារណៈ និងសុខភាពអ្នករស់នៅ ដោយសារតែសំណង់អាគារបែបនិរន្តរភាព និងអេកូឡូស៊ី អាចជួយបង្កើតប្រព័ន្ធខ្យល់ និងបរិយាកាសដ៏ប្រសើរ។
ថ្ងៃនេះ ក្រុមការងាររបស់សារព័ត៌មានថ្មីៗ បានជួបសម្ភាសន៍ជាមួយ លោក ហាវ បាក់ឃន ដែលជាស្ថាបត្យករវ័យក្មេង នៅក្រុមហ៊ុន សសរ សា្ថបត្យកម្ម ដើម្បីពិភាក្សាបន្ថែមទៀត អំពីសារសំខាន់ នៃការរចនាអគារបែបអេកូឡូស៊ី និងប្រកបដោយនិរន្តរភាព ចង់ដឹងថាយ៉ាងណានោះ សូមទស្សនាវីដេអូសម្ភាសន៍ទាំងអស់គ្នា៖
សារព័ត៌មានថ្មីៗ៖ តើអ្វីទៅជាការជំរុញទឹកចិត្តដ៏ធំបំផុត សម្រាប់អាជីពបច្ចុប្បន្នរបស់ បាក់ឃន នៅ សសរ ស្ថាបត្យកម្ម?
លោក ហាវ បាក់ឃន៖ សសរ ស្ថាបត្យកម្ម ពិតជាផ្តល់ឱកាសឱ្យខ្ញុំ បញ្ចេញគំនិត និងអនុវត្តពីអ្វី ដែលខ្ញុំបានរៀននៅសាលា មកកាន់ទិដ្ឋភាពជាក់ស្តែង។ ខ្ញុំបានកត់សម្គាល់ឃើញថា សសរ ស្ថាបត្យកម្ម គឺជាក្រុមហ៊ុនស្ថាបត្យកម្ម និងរចនាផ្នែកខាងក្នុងដ៏លេចធ្លោមួយ នៅក្នុងប្រទេសកម្ពុជា ដែលខ្ញុំក៏អាចដុសខាត់ជំនាញរបស់ខ្ញុំ ខាងស្ថាបត្យកម្ម ហើយសិក្សាបន្ថែម ពីស្ថាបត្យករ ដែលមានបទពិសោធន៍ និងមានទេពកោសល្យដទៃទៀតផង។
សារព័ត៌មានថ្មីៗ៖ តាមទស្សនៈរបស់ បាក់ឃន តើវិស័យស្ថាបត្យកម្ម អាចជួយលើកកម្ពស់ការយល់ដឹងអំពីបរិស្ថាន នៅក្នុងប្រទេសកម្ពុជាយ៉ាងដូចម្តេច?
លោក ហាវ បាក់ឃន៖ ខ្ញុំគិតថានៅពេល ដែលសង្គមមានការរីកចម្រើន ស្ថាបត្យកម្ម ក៏ដើរតួយ៉ាងសំខាន់ ក្នុងការចូលរួមចំណែកនៃការការពារ និងយល់ដឹងអំពីបរិស្ថាន ជាមួយនឹងគោលបំណងលើកកម្ពស់ទីក្រុង និងសហគមន៍ប្រកបដោយនិរន្តរភាព។ ខ្ញុំរំពឹងទុកថា ប្រទេសកម្ពុជា នឹងក្លាយជាប្រទេសពោរពេញទៅដោយពណ៌បៃតង ដែលរួមបញ្ចូលនៃគំនិតអេកូឡូស៊ី ជាមួយនឹងការរចនាស្ថាបត្យកម្មដូចជា៖ សាលារៀន និងផ្សារទំនើប ដើម្បីផ្តល់នូវភាពស្រស់ស្រាយ និងផាសុកភាព។ ដើម្បីលើកកម្ពស់នៃគំនិតអេកូឡូស៊ី និងនិរន្តរភាព ក្នុងនាមជាស្ថាបត្យករ យើងគួរតែចំណាយពេលសិក្សាស្រាវជ្រាវបន្ថែមទៀត លើគម្រោងរចនាស្ថាបត្យកម្មនីមួយៗ។ បើផ្អែកតាមបច្ចេកទេស យើងត្រូវស្វែងយល់ពីវិធីសាស្ត្រ ក្នុងការទាញយកអត្ថប្រយោជន៍ ពីពន្លឺព្រះអាទិត្យ និងខ្យល់ ដើម្បីទទួលបានពន្លឺ និងខ្យល់ធម្មជាតិ ចូលក្នុងអគារ។ ដូច្នេះយើងអាចកាត់បន្ថយបរិមាណការប្រើប្រាស់អគ្គិសនី នៅក្នុងមូលដ្ឋានប្រចាំថ្ងៃរបស់យើង។
ក្នុងនាមខ្ញុំជាស្ថាបត្យករវ័យក្មេង នៅក្នុងប្រទេសកម្ពុជាមួយរូប ខ្ញុំពិតជាកោតសរសើរ លើគម្រោងស្ថាបត្យកម្ម ដែលលេចធ្លោ និងគួរឱ្យស្ញប់ស្ញែងជាច្រើន របស់ស្ថាបត្យករ ដែលគួរឱ្យគោរព និងល្បីល្បាញ គឺ លោក វណ្ណ ម៉ូលីវណ្ណ ដោយគាត់បានរចនាស្ថាបត្យកម្មបែបអេកូឡូស៊ីជាច្រើន នៅក្នុងប្រទេសកម្ពុជាដូចជា៖ អគារប៊ូឌីង និងអគារនៃវិទ្យាស្ថានភាសាបរទេសជាដើម។ ទាំងនេះ គឺជាស្ថាបត្យកម្មដ៏អស្ចារ្យ និងស្រស់ស្អាត ដែលយើងទាំងអស់គ្នា គួរតែយកគំរូតាម។
សារព័ត៌មានថ្មីៗ៖ តើអ្វីទៅដែល បាក់ឃន គិតថាអាចបង្កើតស្ថាបត្យកម្មដ៏អស្ចារ្យ?
លោក ហាវ បាក់ឃន៖ ជាទូទៅមនុស្សជាច្រើនជឿជាក់ថា សារៈសំខាន់នៃស្ថាបត្យកម្ម គឺមិនត្រឹមតែផ្តោតសំខាន់ លើជម្រកតែប៉ុណ្ណោះទេ។ ដើម្បីទទួលបានស្ថាបត្យកម្មដ៏អស្ចារ្យ យើងត្រូវការការរួមបញ្ចូលសិល្បៈ និងវិទ្យាសាស្ត្រជាមួយគ្នា ដើម្បីបង្ហាញពីវប្បធម៌ ទំនៀមទម្លាប់ និងរបៀបរស់នៅ ពីព្រោះថាយើងសាងសង់អគារមួយ ដើម្បីឆ្លុះបញ្ចាំងពីរបៀបរស់នៅរបស់មនុស្សម្នាក់ៗ ហើយស្ថាបត្យកម្មនីមួយៗ គួរតែមាននិរន្តរភាព ដើម្បីរក្សាទុកសម្រាប់មនុស្សជំនាន់ក្រោយដូចជា៖ ប្រាសាទអង្គរវត្តជាដើម៕
(អត្ថបទពាណិជ្ជកម្ម)