COVID-19
ជាតិ
តាមយន្តការ COVAX កម្ពុជាអាចបានវ៉ាក់សាំងដែលផលិតនៅឥណ្ឌា ជិត១,៣លានដូស
× សម្ព័ន្ធថ្នាំបង្ការសកល (Gavi) តាមរយៈគេហទំព័រផ្លូវការរបស់ខ្លួន បានបញ្ចេញតួលេខប៉ុណ្ណោះអាសន្នសម្រាប់បណ្តាប្រទេសចំណូលទាប និងចំណូលមធ្យមកម្រិតទាប ដែលនឹងទទួលបានវ៉ាក់សាំងកូវីដ-១៩ តាមរយៈយន្តការ COVAX ក្នុងត្រីមាសទី១ និងទី២នៃឆ្នាំ២០២១។ កម្ពុជាស្ថិតក្នុងចំណោមប្រទេសដែលត្រូវទទួលបានវ៉ាក់សាំង AstraZeneca/Oxford ជិត១,៣លានដូស។
វ៉ាក់សាំងដែលកម្ពុជានឹងទទួល ជាវ៉ាក់សាំងរបស់ក្រុមហ៊ុនអង់គ្លេស AstraZeneca និងសាកលវិទ្យាល័យ Oxford ហើយផលិតដោយវិទ្យាស្ថាន Serum Institute of India (SII) និងត្រូវដាក់ឈ្មោះថាវ៉ាក់សាំង Covishield ។
តាមយន្តការ COVAX វ៉ាក់សាំង២៤០លានដូសរបស់ AstraZeneca/Oxford ដែលផលិតនៅឥណ្ឌា នឹងត្រូវចែកចាយ រួមជាមួយ៩៦លានដូសទៀត ដែលទិញក្រោមកិច្ចព្រមព្រៀងរវាង Gavi និង ក្រុមហ៊ុន AstraZeneca ផ្ទាល់។ វ៉ាក់សាំងទាំងនេះ នឹងត្រូវចែកចាយនៅត្រីមាសទី១ និងទី២ នៃឆ្នាំ២០២១នេះ។
ក្នុងបញ្ជីបណ្តោះអាសន្នដែលរៀបចំដោយ Gavi កម្ពុជានឹងទទួលបានវ៉ាក់សាំងរបស់ AstraZeneca ផលិតនៅឥណ្ឌា ប្រមាណ ១ ២៩៦ ០០០ដូស ដោយនៅត្រីមាសទី១ នឹងបានពី៣៥ ទៅ៤០ភាគរយ និងពី៦០ ទៅ៦៥ភាគរយសម្រាប់ត្រីមាសទី២។ គម្រោងចែកចាយអាចដំណើរការនៅចុងខែកុម្ភៈនេះ ប៉ុន្តែត្រូវរង់ចាំការចុះបញ្ជីសម្រាប់ការប្រើប្រាស់បន្ទាន់ពីអង្គការសុខភាពពិភពលោក (WHO) ជាមុនសិន៕
© រក្សាសិទ្ធិដោយ thmeythmey.com