COVID-19
អន្តរជាតិ
កូរ៉េខាងជើង នឹងទទួលវ៉ាក់សាំងកូវីដ-១៩ ជិត២លានដូសពី COVAX
×
ដោយ ឈួន ឈីវអ៊ីង
កូរ៉េខាងជើង ដែលនៅតែអះអាងថា គ្មានករណីឆ្លងកូវីដ-១៩ សូម្បីមួយករណីនោះ ក៏បានស្នើសុំវ៉ាក់សាំងពីយន្តការ COVAX ដែរ។ នេះបើតាមការប្រកាសរបស់សម្ពន្ធ GAVI ដែលបានផ្ចុងផ្ដើមបង្កើត COVAX ។ កូរ៉េខាងជើង រំពឹងអាចទទួលបានវ៉ាក់សាំង AstraZeneca-Oxford ជិត២លានដូសនៅដើមឆ្នាំ២០២១ នេះ ដែលបរិមាណនេះមិនខុសគ្នាប៉ុន្មានឡើយពីប្រទេសជាច្រើនទៀតដែលត្រូវទទួលវ៉ាក់សាំងដែរនោះ។
ក្នុងរបាយការណ៍គម្រោងចែងចាយបណ្ដោះអាសន្នរបស់ COVAX កូរ៉េខាងជើង នឹងទទួលបានវ៉ាក់សាំងរបស់ក្រុមហ៊ុន AstraZeneca ដែលផលិតដោយក្រមហ៊ុន Serum Institute របស់ឥណ្ឌាចំនួន១,៩៩លានដូស។ ក្នុងការប្រកាសរបស់ GAVI នៅថ្ងៃទី៣ ខែកុម្ភៈ វ៉ាក់សាំងនេះ ត្រូវការការយល់ព្រមឱ្យប្រើប្រាស់បន្ទាន់ពីសំណាក់អង្គការសុខភាពពិភពលោក (WHO) សិន មុនដំណើការដឹកជញ្ជូន ដែលអាចចាប់ផ្ដើមនៅចុងខែកុម្ភៈ។
ការប្រកាសរបស់សម្ពន្ធ GAVI ជាការបញ្ចេញព័ត៌មានលើកដំបូងដែលកូរ៉េខាងជើង សុំជំនួយអន្តរជាតិជាផ្លូវការ។ កូរ៉េខាងជើង ស្ថិតក្នុងចំណោមប្រទេសដែលមានហេដ្ឋារចនាសម្ព័ន្ធសុខាភិបាលទន់ខ្សោយ ហើយប្រឈមមុខខ្លាំងនឹងការរាលដាលជំងឺកូវីដ-១៩ ជាមួយប្រព័ន្ធសុខាភិបាលយ៉ាប់យ៉ឺននោះ។
យ៉ាងណាមិញ ខណៈជំងឺកូវីដ-៩ រាលដាលស្ទើរពេញពិភពលោកទៅហើយនោះ កូរ៉េខាងជើងនៅតែអះអាងថា ខ្លួនមិនមានករណីឆ្លងឡើយសូម្បីតែមួយ។ ប្រទេសនេះក៏ចាត់វិធានការដ៏តឹងរ៉ឹងផងដែរក្នុងការទប់ស្កាត់ករណីឆ្លង។ កាលពីខែវិច្ឆិកា ឆ្នាំ២០២០ ទីភ្នាក់ងារចារកម្មកូរ៉េខាងត្បូងបានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បានបញ្ជាឱ្យប្រហារជីវិតមនុស្ស២នាក់ និងបានដាក់បម្រាមនេសាទនៅដែនសមុទ្រ ព្រមទាំងបិទរដ្ឋធានីព្យុងយ៉ាង ដើម្បីប្រយុទ្ធប្រឆាំងនឹងជំងឺកូវីដ-១៩ ។
លើសពីនេះ ទីក្រុងព្យុងយ៉ាង ក៏បានប្រតិកម្មខ្លាំងលើការអធិប្បាយណាមួយទាក់ទងស្ថានភាពក្នុងប្រទេសផងដែរ។ អំឡុងខែធ្នូ ឆ្នាំ២០២០ ប្អូនស្រីលោក គីម ជុងអ៊ុន រិះគន់មិនសំចៃមាត់លើរដ្ឋមន្ត្រី ការបរទេសកូរ៉េខាងត្បូង Kang Kyung-wha ចំពោះការសង្ស័យថា គ្មានករណីវិជ្ជមានសូម្បីតែមួយនេះ៕
Tag:
កូរ៉េខាងជើង
កូវីដ-១៩
© រក្សាសិទ្ធិដោយ thmeythmey.com