កីឡាអន្តរជាតិ
អន្តរជាតិ
UCL៖ Liverpool មិនអាចទៅអាល្លឺម៉ង់ប្រកួតជាមួយ Leipzig បានទេ
× Liverpool មិនអាចធ្វើដំណើរទៅអាល្លឺម៉ង់ដើម្បីប្រកួតជាមួយ RasenBallsport Leipzig ពានរង្វាន់ UEFA Champions League ជើងទី១ វគ្គ១៦ក្រុមចុងក្រោយនៅថ្ងៃទី១៦ ខែកុម្ភៈឡើយ។ ការមិនអាចទៅចូលរួមនេះ ដោយសារអាល្លឺម៉ង់បានហាមឃាត់អ្នកធ្វើដំណើរពីបណ្តាប្រទេសនានារួមទាំងអង់គ្លេសផងដើម្បីបង្ការការឆ្លង COVID-19។
បើយោងតាមទីភ្នាក់ងារព័ត៌មាន Reuters ផ្សាយថ្ងៃទី៥ ខែកុម្ភៈនេះ ក្រសួងមហាផ្ទៃអាល្លឺម៉ង់បានចេញសេចក្តីប្រកាសថាក្លិប RB Leipzig ក្នុងក្របខណ្ឌ Bundesliga មិនត្រូវបានអនុញ្ញាតឱ្យទទួលស្វាគមន៍ក្រុមហង្សក្រហមសម្រាប់ក្របខណ្ឌអឺរ៉ុបពេលនេះឡើយ។
សហព័ន្ធកីឡាបាល់ទាត់អឺរ៉ុប (UEFA) បានធ្វើបច្ចុប្បន្នភាពបទប្បញ្ញត្តិរបស់ខ្លួនសម្រាប់ការប្រកួតវគ្គខ្វែង Champions League និង Europa League ចំពេលមានការរីករាលដាលកាន់តែខ្លាមងនៃការឆ្លងជំងឺ COVID-19។ ច្បាប់ថ្មីរបស់ UEFA សរសេរថា ប្រសិនបើការរឹតបន្តឹងដែលបានដាក់ក្នុងប្រទេសមួយអាចបណ្តាលឱ្យប៉ះពាល់ដល់ការប្រកួត នោះក្លិបម្ចាស់ផ្ទះត្រូវតែស្នើសុំកន្លែងជំនួសថ្មីដែលសមរម្យហើយនៅក្នុងប្រទេសអព្យាក្រឹត។
ផ្ទុយទៅវិញ ប្រសិនបើក្លិបម្ចាស់ផ្ទះទាំងឡាយណាខកខានមិនបានធ្វើតាមការលើកឡើងខាងលើនេះទេនោះ ស្ថាប័នគ្រប់គ្រងកីឡាបាល់ទាត់ទ្វីបអឺរ៉ុបនឹងគិតថាការប្រកួតនេះត្រូវឱ្យក្រុមម្ចាស់ផ្ទះចាញ់ ៣-០ ដោយស្វ័យប្រវត្តិ។
ខណៈការរឹតត្បិតរបស់អាល្លឺម៉ង់នឹងបញ្ចប់នៅថ្ងៃទី១៧ ខែកុម្ភៈ រវាងក្រុមលោក Jurgen Klopp និង RB Leipzig អាចមានជម្រើសថ្មី ដោយផ្លាស់ប្តូរឱ្យ Liverpool ធ្វើជាម្ចាស់ផ្ទះសម្រាប់ជំនួបជើងទី១វិញ។ ជើងទី២ គ្រោងនឹងធ្វើឡើងនៅថ្ងៃទី ១០ ខែមីនា៕
© រក្សាសិទ្ធិដោយ thmeythmey.com