ដើម្បីជ្រាបច្បាស់សូមអញ្ជើញលោក-អ្នកទស្សនាបទសម្ភាសរវាង លោក ចាន់ ស៊ីថា មគ្គទេសក៍ទេសចរនៅខេត្តសៀមរាប ជាមួយកញ្ញា អ៊ុត រស្មី អ្នកសារព័ត៌មាននៃសារព័ត៌មាន ThmeyThmey25 ដូចតទៅ៖ 
 

 

ក្រោយមានជំងឺកូវីដ-១៩ លោក ស៊ីថា តែងតែអង្គុយមុខប្រាសាទអង្គរវត្ត និងប្រាសាទបាយ័ន ដើម្បីហៅភ្ញៀវទេសចរ ជួលសេវាកម្មរបស់លោក។ បើតាមលោក ស៊ីថា  ភ្ញៀវទេសចរជាតិដែលជួលមគ្គទេសក៍ទេសចរភាគច្រើន គឺ អ្នកមកពីភ្នំពេញ និងអ្នកមកពីបណ្ដាខេត្តផ្សេងៗ ក្រៅពីខេត្តសៀមរាប។ សម្រាប់ការជួលមគ្គទេសក៍ទស្សនាប្រាសាទអង្គរតូច ភ្ញៀវខ្មែរត្រូវចំណាយលុយ១០ដុល្លារ។ «ការជួលមគ្គទេសក៍ សម្រាប់ទស្សនាប្រាសាទអង្គរតូច មិនកំណត់ម៉ោងទេ ប៉ុន្តែជាធម្មតាយើងជូនគាត់ដើរទស្សនាជុំវិញប្រាសាទរយៈពេល១ម៉ោងកន្លះ ទៅ២ម៉ោង»។ នេះជាការបញ្ជាក់របស់ លោក ស៊ីថា ដោយលោកបានបន្ថែមថា បើភ្ញៀវជួលមគ្គទេសក៍ទស្សនាតាមប្រាសាទនានារយៈពេលមួយថ្ងៃពេញ គឺត្រូវចំណាយលុយ ៣០ដុល្លារ។  
 

ដ្បិតជំងឺកូវីដ-១៩ បានធ្វើឱ្យចំណូលរបស់ លោក ស៊ីថា ធ្លាក់ចុះយ៉ាងខ្លាំងក្ដី ប៉ុន្តែមគ្គទេសក៍រូបនេះ សប្បាយចិត្តក្រោយភ្ញៀវជាតិ បានជួលមគ្គទេសក៍ទស្សនាតាមប្រាសាទនានា ព្រោះកំណើនទេសចរជាតិជួលមគ្គទេសក៍នេះ ជាផ្នែកដ៏សំខាន់ជួយដល់ជីវភាពមគ្គទេសក៍ជាច្រើនដែលកំពុងជួបវិបត្តិដោយសារជំងឺកូវីដ-១៩៕