Luis Suarez នៅតែមានភាពលេចធ្លោក្នុងការរកគ្រាប់បាល់ក្រោយចាកចេញពី Barcelonaក្រោយស៊ុតបញ្ចូលទី២គ្រាប់ឱ្យ Atletico Madrid ក្នុងលទ្ធផលស្មើ Celta Vigo នៅរាត្រីថ្ងៃទី៨ ខែកុម្ភៈ។ ខ្សែប្រយុទ្ធសញ្ជាតិអ៊ុយរូហ្គាយថែមទាំងអាចបំបែកកំណត់ត្រា Cristiano Ronaldo ដែលធ្លាប់ធ្វើបាននៅ La Liga ទៀតផង។
ពីរគ្រាប់របស់ Suarez សម្រេចបានបន្ទាប់ពីការនាំមុខរបស់ភ្ញៀវ Celta ដែលធ្វើបានដោយ Santi Mina នៅនាទី១៣ ក្នុងការប្រកួតក្របខណ្ឌលីគកំពូលអេស្ប៉ាញសប្តាហ៍ទី២០នៅកីឡដ្ឋាន Wanda Metropolitano។ ខ្សែប្រយុទ្ធវ័យ៣៤ឆ្នាំរូបនេះរកបានគ្រាប់តាមស្មើនៅនាទី៤៥ និងគ្រាប់នាំមុនឱ្យ AT-Madrid នៅនាទី៥០ មុនពេល Facundo Ferreyra រកបានគ្រាប់ទី២ និងជាគ្រាប់តាមស្មើសម្រាប់ Celta។ ចប់ការប្រកួត AT-Madrid ស្មើ Celta ២-២។
មិនត្រឹមរកបានពីរគ្រាប់ដើម្បីជួយក្រុមលោក Diego Simeone កើនពិន្ទុនាំមុខក្នុងតារាង La Liga ប៉ុណ្ណោះទេ Suarez ថែមទាំងបំបែកកំណត់ត្រាអ្នករកគ្រាប់បាល់លឿនរបស់ Ronaldo ទៀតផង។ អតីតសមាជិក Liverpool និង Barcelona រកបានគ្រាប់ទី១៦ហើយ ក្នុងការប្រកួត១៧លើកសម្រាប់ AT-Madrid រដូវកាល២០២០-២១ នេះ ដែលលើសប្រធានក្រុមព័រទុយហ្គាល់ដែលធ្វើបាន១៥គ្រាប់ក្នុងចំណោម១៧ប្រកួតឱ្យ Real Madrid កាលពីរដូវកាល ២០០៩-២០១០ ក្រោយចាកចេញពី Manchester United។
Suarez កំពុងនាំមុខគេក្នុងនាមអ្នកស៊ុតចូលទីច្រើនជាងគេនៅ La Liga ចំនួន១៦គ្រាប់ តាមពីក្រោយដោយ Lionel Messi របស់ Barcelona ១៣គ្រាប់ និង Youssef En-Nesyri ខ្សែប្រយុទ្ធ Sevilla ១៣គ្រាប់។ Gerard Moreno របស់ Villarreal ធ្វើបាន ១២គ្រាប់ ខណៈ Karim Benzema (Real Madrid), Mikel Oyarzabal (Real Sociedad) និង José Luis Morales (Levante) ធ្វើបាន១០គ្រាប់ដូចគ្នា។
សម្រាប់លទ្ធផលពិន្ទុក្រុមនៅលីគកំពូលអេស្ប៉ាញ Atletico Madrid កំពុងនាំមុខកំពូលតារាងមាន ៥១ពិន្ទុពីការប្រកួត២០លើក នាំមុខគូប្រជែង Barca និង Real Madrid ៨ពិន្ទុ ហើយនៅសល់មួយប្រកួតក្នុងដៃថែមទៀត៕