កីឡាអន្តរជាតិ
អន្តរជាតិ
Aubameyang ក្លាយជាកីឡាករទី៣ ដែលរកបាន Hat-trick នៅថ្ងៃ Valentine’s day
× ភ្នំពេញ៖ ក្រុម Arsenal បានយកឈ្នះក្រុម Leed United ដោយលទ្ធផល៤ទល់២ នៅទឹកដី Emirates Stadium កាលពីថ្ងៃទី១៤ កុម្ភៈ។ Pierre-Emerick Aubameyang ក្លាយជាកីឡាករទី៣ ដែលរកបាន Hat-trick នៅថ្ងៃទិវាសេចក្តីស្រឡាញ់នេះ។
៤គ្រាប់របស់ក្លិបកាំភ្លើងធំ Arsenal រកបានដោយខ្សែប្រយុទ្ធសញ្ជាតិហ្គាប៊ុង Aubameyang ចំនួន៣គ្រាប់ គឺនៅនាទី១៣ ដោយការបណ្ដើរបាល់ស៊ុតបញ្ចូលទីយ៉ាងល្អ ក្រោយពីការបញ្ជូនបាល់ពីខ្សែបម្រើ Granit Xhaka ។ ការប្រកួតជិតចប់តង់ទី១ទៅហើយ Aubameyang មានឱកាសរកបានមួយគ្រាប់ទៀត នៅនាទី៤១ ដោយការស៊ុតបាល់ពិន័យ១១ម៉ែត្រ មុននឹងខ្សែការពារសញ្ជាតិអេស្ប៉ាញ Hector Bellerin បន្ថែម១គ្រាប់ នៅនាទី៤៥។
ការប្រកួតឈានដល់វគ្គទី២ ខ្សែប្រយុទ្ធសញ្ជាតិហ្គាប៊ុង វ័យ៣១ឆ្នាំរូបនេះ បានរកគ្រាប់ទី៣របស់ខ្លួន នៅនាទី៤៧ ដោយការបញ្ជូនបាល់ពីកីឡាករ Emile Smith-Rowe ដែលនាំឱ្យ Arsenal នាំមុខ Leed United ៤ទល់០។ Leed United ក៏ប្រឹងវាយសម្រុកArsenal វិញដែរ រហូតរកបាន២គ្រាប់ នៅនាទី៥៨ និង៦៩ ដោយកីឡាករ Pascal Struijk និង Helder Costa ។
សម្រាប់ការប្រកួតនេះ Aubameyang ក៏ក្លាយជាកីឡាករទី៣ ដែលរកបាន Hat-trick នៅថ្ងៃទិវាសេចក្តីស្រឡាញ់នេះ (Valentine’s day)។ កីឡាករ ដែលរកគ្រាប់បាល់ Hat-trick នៅថ្ងៃទិវានៃក្តីស្រឡាញ់ដំបូងគេនោះ គឺខ្សែបម្រើប្រយុទ្ធសញ្ជាតិអង់គ្លេស Matt Le Tissier រកបាន៣គ្រាប់ ដែលជួយឱ្យក្រុម Southamton យកឈ្នះ Liverpool ដោយលទ្ធផល៤ទល់២ នៅឆ្នាំ១៩៩៤។
ដោយឡែកខ្សែប្រយុទ្ធសញ្ជាតិអង់គ្លេសMichael Owen ក៏រកបាន៣គ្រាប់ ក្នុងការប្រកួតរវាងក្រុម Liverpool និង Sheffield Wednesday ដោយលទ្ធផល៣ទល់៣ នៅឆ្នាំ១៩៩៨ នាថ្ងៃទិវានៃក្តីស្រឡាញ់នេះដែរ។
សម្រាប់ការលេងឱ្យ Arsenal ១០៥ ប្រកួតនៅ Premier League ចាប់ពីឆ្នាំ២០១៧មក Aubameyang រកបាន៦២គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ជូលទី១៣លើក។
© រក្សាសិទ្ធិដោយ thmeythmey.com