Bayern Munich ចំណាយ៥២លានដុល្លារ ទិញ Upamecano ពី Leipzig អំឡុងវិបត្តិ COVID-19

កីឡាអន្តរជាតិ

អន្តរជាតិ

Bayern Munich ចំណាយ៥២លានដុល្លារ ទិញ Upamecano ពី Leipzig អំឡុងវិបត្តិ COVID-19

15, Feb 2021 , 2:39 pm

រូបភាព

ដោយ: ទេព ពិទូរ្យ

Bayern Munich ទិញបានខ្សែការពារ Dayot Upamecano ពីក្រុមគូប្រជែង RasenBallsport Leipzig ក្នុងតម្លៃផ្តាច់កិច្ចសន្យា (buy-out clause) ៥២លានដុល្លារ។ នេះជាការទិញដូរកីឡាករក្នុងតម្លៃដ៏ថ្លៃបំផុតអំឡុងវិបត្តិ COVID-19 នាទីផ្សារដោះដូរលើកទី២រដូវកាល ២០២០-២១។

កីឡាករអន្តរជាតិបារាំង Upamecano រូបនេះនឹងចូលរួមជាមួយក្រុមម្ចាស់ជើងឯកអាល្លឺម៉ង់នៅថ្ងៃទី១ ខែកក្កដា ក្នុងកិច្ចសន្យារយៈពេល៥ឆ្នាំ។ លោក Hasan Salihamidzic នាយកផ្នែកកីឡារបស់ក្លិប Bayern Munich ជឿជាក់ថា ខ្សែការពារវ័យ២២ឆ្នាំនឹងក្លាយជាសមាជិកដ៏សំខាន់សម្រាប់ក្រុមនៅរដូវកាលក្រោយ និងរដូវកាលប៉ុន្មានឆ្នាំខាងមុខនេះ។

Upamecano ដែលធ្លាប់មានទំនាក់ទំនងជាមួយក្លិបធំៗដូចជា Manchester United, Chelsea និង Liverpool ជាដើមនោះ បានរួមរស់ជាមួយ RB Leipzig រយៈ៤ ឆ្នាំកន្លះមកហើយ ដោយបង្ហាញខ្លួនបាន ១៣៩ ប្រកួត និងស៊ុតបញ្ចូលទី៤គ្រាប់។

ក្រុមម្ចាស់ការពារតំណែងជើងឯក Bayern Munich ដែលមានលោក Hans-Dieter Flick ជាគ្រូបង្វឹកកំពុងនាំមុខកំពូលតារាង Bundesliga ដោយមាន៤៨ពិន្ទុលើក្រុមលេខពីរ Leipzig ចំនួន៤ពិន្ទុ ហើយសល់មួយប្រកួតក្នុងដៃថែមទៀត។

ដោយឡែក Leipzig វិញបើទោះជាមានការទិញដូរគ្នាហើយក្តី តែ Upamecano នៅតែអាជួយក្រុមដល់ចុងរដូវកាល។ Leipzig នឹងត្រូវជួប Liverpool នៅវគ្គ ១៦ ក្រុមចុងក្រោយ Champions League ជើងទី១ ដែលធ្វើឡើងក្នុងក្រុងប៊ុយដាប៉ែស ប្រទេសហុងគ្រី៕