អន្តរជាតិ
DNA ចំណាស់ជាងគេលើលោកត្រូវបានរកឃើញក្នុងថនិកសត្វអាយុកាល១,២លានឆ្នាំ DNA អាយុកាលជាង១លានឆ្នាំពីអំបូរដំរី Steppe Mammoths។ រូបតំណាងរបស់វិចិត្រករ Beth Zaiken CPG
× អ្នកវិទ្យាសាស្ត្រនៅស៊ុយអែត បានប្រកាសពីការសិក្សាថ្មីរបស់ខ្លួនលើសំណាក DNA ពីថ្គាមថនិកសត្វនៅតំបន់ស៊ីបេរី ដែលមានអាយុកាលប្រមាណ១,២លានឆ្នាំ។ វាជាការសិក្សាដែលបើកច្រកសម្រាប់ការសិក្សាលើការវិវត្តរបស់អំបូរសត្វផ្សេងៗទៀតនាពេលខាងមុខ។ នេះបើយោងតាមការផ្សាយរបស់ British Journal Nature។
DNA ដែលមានអាយុកាលប្រមាណ១,២លានឆ្នាំនេះ ត្រូវបានរកឃើញពីអំបូរសត្វ (Steppe Mammoth) ពីរប្រភេទ ហើយត្រូវបានគេស្គាល់ថាជាអំបូរដើមនៃដំរីរោមវែង (Wolly Mammoth)។ កន្លងមក DNA ចំណាស់បំផុត គឺយកចេញពីសត្វសេះមួយក្បាលដែលរស់នៅលើទឹកដី Yukon ប្រទេសកាណដា កាលពីប្រមាណ៧សែនឆ្នាំមុន។
លោក Love Dalen សាស្ត្រាចារ្យនៅមជ្ឈមណ្ឌល Palaeogenetics នៅក្រុងស្កុកហូម ប្រទេសស៊ុយអែត បានអះអាងក្នុងសេចក្តីប្រកាសព័ត៌មានថា វត្ថុសំណាក DNA នេះ ពិតជាមានវ័យចំណាស់ខ្លាំងបំផុត ដែលជាថ្គាមថនិកសត្វពីដើម និងកណ្តាលសម័យកាល Pleistocene ឯតំបន់ស៊ីបេរី។
តាមពិតទៅ សំណាកថនិកសត្វទាំងនេះ ត្រូវបានរកឃើញកាលពីអំឡុងឆ្នាំ១៩៧០ ប៉ុន្តែត្រូវបានរក្សាទុកនៅបណ្ឌិត្យសភាវិទ្យាសាស្ត្ររុស្ស៊ី ក្រុងមូស្គូ។ លទ្ធផល DNA អាចជួយឲ្យអ្នកវិទ្យាសាស្ត្រមានពន្លឺបន្ថែមពីការបន្លាស់ទី និងការវិវត្តរបស់ថនិកសត្វលើពិភពលោក។
លោក Anders Gotherstrom សាស្ត្រាចារ្យម្នាក់ទៀតដែលដឹកនាំការសិក្សាស្រាវជ្រាវនៅ Center for Palaeogentics បានអះអាងថា៖«យើងមិនទាន់ឈានដល់កាលកំណត់ឡើយ ដោយការសិក្សានឹងនាំឲ្យយើងស្រាវជ្រាវរកឃើញ DNA ដែលមានអាយុកាលពី២លាន ទៅ២,៦លានឆ្នាំមុនបន្ថែមទៀត»៕
© រក្សាសិទ្ធិដោយ thmeythmey.com