COVID-19
ជាតិ
កណ្តាល៖អ្នកពាក់ព័ន្ធព្រឹត្តិការណ៍២០កុម្ភៈ ៧៥នាក់ ត្រូវបានដាក់ឲ្យធ្វើចត្តាឡីស័ក អភិបាលខេត្តកណ្តាលចុះពិនិត្យ និងបញ្ជូនអ្នកពាក់ព័ន្ធព្រឹត្តិការណ៍២០កុម្ភៈ ចំនួន៧៥ ទៅមណ្ឌលចត្តាឡីស័ក។ (រូបពីរដ្ឋបាលខេត្តកណ្ដាល)
× ភ្នំពេញ៖ អាជ្ញាធរខេត្តកណ្ដាល បានរកឃើញអ្នកពាក់ព័ន្ធនឹងព្រឹត្តិការណ៍សហគមន៍២០កុម្ភៈ ចំនួន៧៥នាក់ គិតត្រឹមសៀលថ្ងៃទី២១កុម្ភៈនេះ។ ពួកគេត្រូវបានដាក់ឲ្យធ្វើចត្តាឡីស័ក នៅមណ្ឌលចត្តាឡីស័កសាលាបឋមសិក្សាព្រែកតាពៅ ក្នុងសង្កាត់ដើមមៀន ក្រុងតាខ្មៅ។
នៅយប់ថ្ងៃទី២១កុម្ភៈ រដ្ឋបាលខេត្តកណ្ដាលបានផ្សាយលើទំព័រហ្វេសប៊ុករបស់ខ្លួនថា ៖«បុគ្គលិកភោជនីយដ្ឋានឡូហ្សិក២ ចំនួន៧៥នាក់ត្រូវបានរកឃើញថាជាប់ពាក់ព័ន្ធនឹងព្រឹត្តិការណ៍២០កុម្ភៈ។ បុគ្គលិកទាំង៧៥នោះ ត្រូវបានអភិបាលខេត្ត រៀបចំបញ្ជូនទៅដាក់ចត្តាឡីស័កនៅសាលាបឋមសិក្សាព្រែកតាពៅ សង្កាត់ដើមមៀន ក្រុងតាខ្មៅ»។
នៅយប់ថ្ងៃនេះដែរ ក្រសួងអប់រំ យុវជន និងកីឡា ក៏បានប្រកាសឲ្យផ្អាកដំណើរការសាលារៀន វិទ្យាល័យសម្ដេច ហ៊ុន សែន ភ្នំពេញថ្មី និងសាលាអន្តរជាតិ អេស អាយ អេស សាខាឡាក់គីស្តារផងដែរ ដោយសាររកមានអ្នកជាប់ពាក់ព័ន្ធនឹងព្រឹត្តិការណ៍២០កុម្ភៈ។ ក្រសួងអប់រំ ក៏អំពាវនាវឲ្យអ្នកជាប់ពាក់ព័ន្ធទាំងអស់ទៅយកសំណាកទៅពិនិត្យនៅថ្ងៃស្អែកនេះ។
របាយការណ៍ក្រសួងបង្ហាញថា តួលេខអ្នកឆ្លងសរុបនៅកម្ពុជាឡើងដល់៥៣៣នាក់ ក្នុងនោះ៤៧៣នាក់ បានជាសះស្បើយ និង៦០នាក់បន្តសម្រាកព្យាបាលនៅមន្ទីរពេទ្យ។ បើគិតតែចំនួនអ្នកឆ្លងសម្រាប់ព្រឹត្តិការណ៍សហគមន៍២០កុម្ភៈ អ្នកជំងឺមាន៤៣នាក់ ដែលភាគច្រើនជាជនជាតិចិន និងវៀតណាម២នាក់៕
© រក្សាសិទ្ធិដោយ thmeythmey.com