ជាតិ
ព្រឹត្តិការណ៍២០ កុម្ភៈ ៖ ទិវាជាតិទីក្រុងស្អាតលើកទី៩ ត្រូវលើកពេលប្រារព្ធនៅខែមីនាវិញ លោក តុប សុភ័ក អ្នកនាំពាក្យក្រសួងទេសចរណ៍
× ភ្នំពេញ៖ ទិវាជាតិទីក្រុងស្អាតលើកទី៩ និងការប្រកាសចលនាប្រឡូងប្រណាំងទីក្រុងស្អាតលើកទី៣ ដែលគ្រោងនឹងប្រារព្ធឡើងនៅថ្ងៃទី២៧ កុម្ភៈ ត្រូវបានលើកទៅធ្វើនៅពាក់កណ្តាលខែមីនា ឆ្នាំ២០២១ វិញ។ បើតាមលោក តុប សុភ័ក អ្នកនាំពាក្យក្រសួងទេសចរណ៍ ការពន្យាពេលប្រារព្ធទិវាជាតិនេះ គឺដោយសារការផ្ទុះឡើងនៃព្រឹត្តិការណ៍សហគមន៍២០កុម្ភៈ។
ការពន្យាពេលប្រារព្ធទិវាជាតិទីក្រុងស្អាតលើកទី៩នេះ ដើម្បីចូលរួមទប់ស្កាត់ការឆ្លងការរាលដាលនៃជំងឺកូវីដ-១៩។ កាលពីថ្ងៃទី១កុម្ភៈ លោក ថោង ខុន រដ្ឋមន្ត្រីក្រសួងទេសចរណ៍ និងជាគណៈកម្មាធិការជាតិវាយតម្លៃទីក្រុងស្អាត បានស្នើឱ្យអាជ្ញាធរគ្រប់រាជធានី-ខេត្តទាំងអស់ ត្រូវរៀបចំកម្មវិធីបញ្ជ្រាបការយល់ដឹងជាសាធារណៈអំពីអនាម័យបរិស្ថាននិងទីក្រុងស្អាត ដើម្បីចូលរួមអបអរសាទរទិវាជាតិទីក្រុងស្អាតលើកទី៩ឆ្នាំ២០២១ ក្រោមប្រធានបទ «ទម្លាប់ថ្មី ដើម្បីទីក្រុងស្អាត» ដែលនឹងធ្វើឡើងនៅថ្ងៃទី២៧ ខែកុម្ភៈ។ នេះបើយោងតាមលិខិតគណៈកម្មាធិការជាតិវាយតម្លៃទីក្រុងស្អាត។
គិតត្រឹមថ្ងៃទី២២ខែកុម្ភៈ ក្រសួងសុខាភិបាលបានរកឃើញមនុស្សចំនួន៧៦នាក់ហើយ ដែលបានឆ្លងកូវីដ-១៩ នៅក្នុងព្រឹត្តិការណ៍សហគមន៍២០កុម្ភៈ។ ដោយឡែក គិតជាចំនួនសរុបកម្ពុជាមានអ្នកឆ្លងកូវីដ-១៩ រហូតដល់៥៦៨នាក់ ដោយក្នុងនោះ មាន៤៧៥នាក់ បានជាសះស្បើយ និង៩៣នាក់ទៀត កំពុងសម្រាកព្យាបាលនៅមន្ទីរពេទ្យនានា៕
© រក្សាសិទ្ធិដោយ thmeythmey.com