កីឡាអន្តរជាតិ
អន្តរជាតិ
អូឡាំពិក៖ ជប៉ុន គ្រោងមិនឱ្យមានអ្នកទស្សនាពីក្រៅប្រទេស ព្រោះខ្លាចចម្លងកូវីដ-១៩
× រដ្ឋាភិបាលជប៉ុនគ្រោងនឹងមិនអនុញ្ញាតឱ្យអ្នកគាំទ្រពីក្រៅប្រទេសចូលរួមព្រឹត្តិការណ៍អូឡាំពិករដូវក្តៅឆ្នាំ២០២០នេះឡើយ ដ្បិតបារម្ភថាពួកគេនឹងចម្លងជំងឺ COVID-19 កាន់តែខ្លាំង។ នេះបើយោងតាមព័ត៌មានក្នុងស្រុកជប៉ុនមួយចុះផ្សាយនៅថ្ងៃទី៣ ខែមីនា ស្របពេលប្រជាជនជប៉ុនភាគច្រើននៅតែប្រឆាំងនឹងដំណើរការព្រឹត្តិការណ៍នេះ។
កាសែត Mainichi បានដកស្រង់ប្រភពដែលសុំមិនបញ្ចេញឈ្មោះជាច្រើនថា សេចក្តីសម្រេចចុងក្រោយជុំវិញករណីខាងលើ នឹងត្រូវធ្វើឡើងនៅខែមីនានេះ បន្ទាប់ពីកិច្ចពិភាក្សាជាមួយគណៈកម្មាធិការអូឡាំពិកអន្តរជាតិ (IOC) និងនៅក្នុងកិច្ចប្រជុំផ្សេងៗទៀត។
កាសែតដដែលនេះបន្ថែមថា រដ្ឋាភិបាលជប៉ុននឹងបន្តពិចារណាថា តើត្រូវទទួលអ្នកទស្សនាពីក្នុងប្រទេសជប៉ុន រួមទាំងចំនួនខ្លះដែលត្រូវអនុញ្ញាតឱ្យចូលកីឡដ្ឋាន ឬយ៉ាងណានោះ។ ការចុះផ្សាយនេះ កើតឡើងនៅពេលដែលគណៈកម្មាធិការរៀបចំកីឡាតាមតំបន់ គ្រោងនឹងរៀបចំកិច្ចប្រជុំមួយនៅថ្ងៃទី៣ ខែមីនា ជាមួយមន្ត្រី IOC, គណៈកម្មាធិការប៉ារ៉ាឡាំពិកអន្តរជាតិ (IPC) រួមទាំងរដ្ឋាភិបាលក្រុងតូក្យូ និងមន្ត្រីរដ្ឋាភិបាលជប៉ុន។
គោលបំណងសំខាន់ក្នុងកិច្ចប្រជុំនេះ គឺថាតើត្រូវអនុញ្ញាតឱ្យអ្នកគាំទ្រចូលទស្សនាផ្ទាល់ទៅកន្លែងប្រកួតឬ ក៏អត់ រួមទាំងគម្រោងមិនអនុញ្ញាតឱ្យអ្នកគាំទ្រពីក្រៅស្រុកចូលទឹកដីជប៉ុនផង? អ្នករៀបចំកីឡាអូឡាំពិកក្រុងតូក្យូអះអាងថាពួកគេនឹងសម្រេចចិត្តអំពីបញ្ហានេះក្នុងអំឡុងខែមីនា។
តាមរយៈការស្ទង់មតិរបស់កាសែត Yomiuri នៅថ្ងៃទី៣ ខែមីនា ប្រសិនបើព្រឹត្តិការណ៍កីឡាលំដាប់ពិភពលោកដែលត្រូវពន្យារ១ឆ្នាំដោយសារ COVID-19 ដំណើរការទៅតាមការគ្រោងទុកមែននោះ ប្រជាជនជប៉ុនចំនួន ៩១ ភាគរយចង់ឱ្យមានទស្សនាក្នុងកីឡដ្ឋានក្នុងចំនួនតិចបំផុត ឬមិនឱ្យមានតែម្តង។
បើមិនមានការប្រែប្រួលអ្វីទេ អូឡាំពិកក្រុងតូក្យូឆ្នាំ២០២០ នឹងចាប់ផ្តើមការប្រកួតផ្លូវការពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១៕
© រក្សាសិទ្ធិដោយ thmeythmey.com