ភ្នំពេញ៖ អ្នកនិពន្ធ ជុំ កាណាល់ ជាអតីតអនុប្រធានសមាគមអ្នកនិពន្ធខ្មែរ(១៩៩៥-១៩៩៧) បានទទួលមរណភាព ក្នុងជន្មាយុ៧០ឆ្នាំ ដោយជរាពាធ នៅគេហដ្ឋានសព ក្នុងភូមិម័រ ខណ្ឌដង្កោ រាជធានីភ្នំពេញ នៅវេលាម៉ោង ៧.០០នាទីព្រឹក ថ្ងៃអាទិត្យទី៧ ខែមីនា ឆ្នាំ២០២១។
បើតាមលោក ព្រាម តុង ដែលត្រូវជាកូនប្រសាររបស់សព បានប្រាប់សារព័ត៌មានថ្មីៗតាមទូរសព្ទថា សពរបស់លោក ជុំ កាណាល់ និងត្រូវបូជានៅព្រឹកថ្ងៃអង្គារ ទី៩ ខែមីនា នៅវត្តឫស្សីសាញ។ «សពរបស់គាត់យើងនឹងបូជានៅព្រឹកថ្ងៃអង្គារ នៅវត្តឫស្សីសាញ លើផ្លូវ៥០ម៉ែត្រ នៅជិតព្រៃស»។ នេះជាការបញ្ជាក់របស់លោក ព្រាម តុង។
លោក ជុំ កាណាល់ កើតនៅថ្ងៃទី១០ ខែមីនា ឆ្នាំ១៩៤៩។ លោក បានក្លាយជាសិស្សរបស់ព្រះភិក្ខុធម្មបាល ខៀវ ជុំ ក្នុងឆ្នាំ១៩៦៣ ដោយស្នាក់នៅវត្តលង្ការ។ ចំណេរក្រោយមកទៀត លោកបានចូលបម្រើការងារក្នុងវិស័យនិពន្ធប្រលោមលោក ជាមួយនឹងមិត្តភ័ក្ត្រ ទី ជីហួត។ លោក ជុំ កាណាល់ ជាអ្នកកាសែត នៅក្នុងឆ្នាំ១៩៧១ ដល់សម័យប៉ុលពតឆ្នាំ១៩៧៥។
លោក ជុំ កាណាល់ មានចំណេះនិងជំនាញជាច្រើន ដោយបានទទួលតួនាទីធំៗមួយចំនួន។ ហើយខាងក្រោមនេះ គឺជាប្រវត្តិការការនិងតួនាទីរបស់លោក។
នៅថ្ងៃទី២ ខែមករា ឆ្នាំ១៩៧៩ ដល់ ថ្ងៃទី២៣ ខែមីនា ឆ្នាំ១៩៨០ លោកជាប្រធានចាត់តាំងស្រុកដង្កោ ខេត្តកណ្ដាល។ ថ្ងៃទី២៣ ខែមីនា ឆ្នាំ១៩៨០ ដល់ថ្ងៃទី៣០ ខែសីហា ឆ្នាំ១៩៨៨ លោកជាអភិបាលស្រុកដង្កោ ខេត្តកណ្ដាល។ នៅថ្ងៃទី៨ ខែមករា ឆ្នាំ១៩៨១ លោកបានចូលក្នុងគណបក្សប្រជាជនកម្ពុជា។ លោកជាប្រធានគណៈកម្មការ ត្រួតពិនិត្យអត្ថបទប្រលោមលោក និងជាអ្នកនិពន្ធប្រលោមលោកផងដែរ ដោយក្នុងនោះមានរឿង “ប្រាំឆ្នាំចាំបង” រឿង “នឹកខេត្តពោធិសាត់” រឿង “ខុសបំណង” រួមទាំងអត្ថបទអក្សរសិល្ប៍ខ្មែរសង្ខេបបែបថ្មីទំនើប។
លោក ជុំ កាណាល់ ជាចាហ្វាងផលិតកម្មឥន្ទ្រីមាសភាពយន្ត ដែលជាអ្នកនិពន្ធអត្ថបទភាពយន្តផង និងជាអ្នកដឹកនាំថតភាពយន្តចំនួន៣រឿងផង ដូចជារឿង “ឃ្លាតទាំងទឹកភ្នែក” រឿង “ថ្ងៃណាអូនវិលវិញ” និងរឿង មេកន្ទ្រាញភ្នំ១០០”។
ពីថ្ងៃទី២ខែកុម្ភៈ ឆ្នាំ១៩៩៣ ដល់ថ្ងៃទី៣ ខែមិថុនា ឆ្នាំ១៩៩៥ ជាប្រធានមន្ទីរព័ត៌មានរាជធានីភ្នំពេញ។ ថ្ងៃទី៣ ខែមិថុនា ឆ្នាំ១៩៩៥ ដល់ថ្ងៃទី៣០ ខែមេសា ឆ្នាំ១៩៩៩ ជាប្រធានសម្ព័ន្ធសារព័ត៌មានកម្ពុជា។ ឆ្នាំ១៩៩៦ ជាសមាជិកសម្ព័ន្ធអ្នកសារព័ត៌មានអន្តរជាតិ(IFJ) ស្នាក់ការនៅប្រទេសប៊ែលហ្សិក។ ថ្ងៃទី៣០ ខែមេសា ឆ្នាំ១៩៩៩ ដល់ថ្ងៃទី៥ ខែមីនា ឆ្នាំ២០០១ ជាទីប្រឹក្សាផ្ទាល់របស់សម្ដេចនាយករដ្ឋមន្ត្រី ហ៊ុន សែន។
ថ្ងៃទី៥ ខែមីនា ឆ្នាំ២០០១ ដល់ថ្ងៃទី១ ខែមិថុនា ឆ្នាំ២០០៩ ជាមន្ត្រីខុទ្ទកាល័យសម្ដេចនាយករដ្ឋមន្ត្រី នាទីស្ដីការគណៈរដ្ឋមន្ត្រី។ ឆ្នាំ២០០៤ ដល់ឆ្នាំ២០០៥ បន្តដឹកនាំជាប្រធានសម្ព័ន្ធអ្នកសារព័ត៌មានកម្ពុជា ជាលើកទី២ ដោយមានការបោះឆ្នោត។ លោកក៏ជាចាហ្វាងកាសែតដំណឹងចុងក្រោយផងដែរ៕