COVID-19
អន្តរជាតិ
ការដឹកជញ្ជូនទំនិញតាមនាវា។ រូបភាព៖AFP
×![]()
កំណើននៃការនាំចេញផលិតផលរបស់ចិន មានការកើនឡើងខ្ពស់បំផុតក្នុងរយៈពេល២០ឆ្នាំចុងក្រោយ។ របាយការណ៍ផ្លូវការណ៍នៃរដ្ឋាភិបាលចិន បង្ហាញថាកំណើនក្នុងកម្រិតមួយដ៏ខ្ពស់បន្ទាប់ពីសកម្មភាពសេដ្ឋកិច្ច និងឧស្សាហកម្មរបស់ចិនងើបឡើងវិញក្រោយរងផលប៉ះពាល់ដោយជំងឺកូវីដ-១៩។
ផលិតផលអេឡិកត្រូនិក និងសម្លៀកបំពាក់ដែលរួមមានម៉ាស់ និងឧបករណ៍ពាក់ការពារខ្លួនប្រឆាំងជំងឺកូវីដ-១៩ រួមចំណែកយ៉ាងសន្ធឹកសន្ធាប់ដល់ការងើបឡើងវិញនូវការនាំចេញរបស់ចិន។ ការនាំចេញរបស់ចិនកើនឡើងចំនួន៦០,៦ភាគរយនៅចន្លោះខែមករា និងកុម្ភៈឆ្នាំ២០២១ ធៀបទៅនឹងពេលវេលាដូចគ្នានាឆ្នាំ២០២០ ចំណែកឯការនាំចូលវិញកើន២២,២ភាគរយ។ នេះយោងតាមទីភ្នាក់ងារព័ត៌មានAFP។
កំណើននៃការនាំចេញរបស់ចិននេះ គឺជាការកើនឡើងក្រោយពេលការនាំចេញរបស់ចិនធ្លាក់ចុះ១៧ភាគរយ និង៤ភាគរយសម្រាប់ការនាំចូលនាឆ្នាំ២០២០។ ការមិនអាចទប់ទៅនឹងជំងឺកូវីដ-១៩នៅដំណាក់កាលដំបូង និងការធ្វើការនៅផ្ទះ ក៏ដូចជាការបើកជាបណ្តើរៗនូវអាជីវកម្មជាហេតុនាំឱ្យការនាំចេញ និងនាំចូលធ្លាក់ចុះ។
ចំពោះការកើនឡើងក្នុងកម្រិតដ៏ច្រើននៃការនាំចេញនេះ មន្ត្រីគយចិននិយាយថា ភាគរយមានចំនួនខ្ពស់ដោយសារមូលដ្ឋានប្រៀបធៀបមានទំហំតិច។ របាយការណ៍ផ្លូវការណ៍របស់អាជ្ញាធរគយចិន បង្ហាញថាការនាំចេញផលិតផលអេឡិកត្រូនិក មានការកើនឡើង៥៤,១ភាគរយ ខណៈផលិតផលវាយនភណ្ឌមានការកើនឡើង៥០,២ភាគរយ ចំណែកឯទឹកប្រាក់ដែលចំណេញពីការធ្វើពាណិជ្ជកម្មមានទំហំ១០៣,៣ពាន់លានដុល្លារ។
អាជ្ញាធរគយចិន បញ្ចូលទិន្ន័យខែមករា និងកុម្ភៈក្នុងចំនួនតែមួយដោយសារតែគ្រានោះចិន កំពុងប្រយុទ្ធទៅនឹងករណីឆ្លងទម្រង់ថ្មីនៃជំងឺកូវីដ-១៩ ក៏ដូចជាដើម្បីរាប់បញ្ចូលចំណាយនាពេលចូលឆ្នាំចិនផងដែរ។
អាជ្ញាធរគយចិននិយាយថាពាណិជ្ជកម្មក្រៅប្រទេសរបស់ចិនមានសភាពរឹងមាំ បើទោះបីជាពុំមែនជារដូវដែលមានតម្រូវការច្រើនក្តី។ រឿងនេះ បណ្តាលមកពីការចាប់ផ្តើមទិញឡើងវិញនៅបណ្តារប្រទេសអឺរ៉ុប និងអាមេរិកអំឡុងពេលផ្ទុះជំងឺកូវីដ-១៩ ក៏ដូចជាការកើនឡើងនូវតម្រូវការក្នុងស្រុកផងដែរ។ បន្ថែមពីនេះ ផលិតកម្មក្នុងអំឡុងខែមករា និងកុម្ភៈមានការកើនឡើង ដ្បិតអីអាជ្ញាធរអំពាវនាវកុំឱ្យពលរដ្ឋធ្វើដំណើរទៅស្រុក និងបន្តរធ្វើការអំឡុងពេលបុណ្យចូលឆ្នាំចិន។
«ក្រុមហ៊ុនជាច្រើននៅខេត្តGuangdong និងZhejiang បន្តររក្សាកម្រិតផលិតកម្មអំឡុងពេលបុណ្យចូលឆ្នាំចិន ដែលជាហេតុធ្វើឱ្យសេដ្ឋកិច្ចអាចងើបឡើងចខ្ពស់ជាការរំពឹងទុក»។ នេះជាការលើកឡើងក្នុងរបាយការណ៍គយចិន។ ចំពោះការកើនឡើងក្នុងការនាំចូលវិញ បណ្តាលមកពីក្រុមហ៊ុនមួយចំនួនទិញទុកនូវសម្ភារៈមួយចំនួនដូចជាសៀគ្វី រ៉ែដែក និងប្រេងឆៅជាដើម។
ទោះជាការនាំចូល និងនាំចេញកើនឡើងក្នុងខែមករា និងកុម្ភៈក្តី អាជ្ញាធរចិននិយាយថាភាពមិនច្បាស់លាស់នៃស្ថានការណ៍ពិភពលោក នឹងធ្វើឱ្យចិនចំណាយពេលយូរទៅមុខទៀតដើម្បីសម្រេចបានកំណើនពាណិជ្ជកម្មប្រកបដោយស្ថិរភាព៕
Tag:
ចិន
កូវីដ-១៩
© រក្សាសិទ្ធិដោយ thmeythmey.com
