អន្តរជាតិ
កូរ៉េខាងត្បូង និងអាមេរិកធ្វើសមយុទ្ធយោធាប្រចាំឆ្នាំតែក្នុងទ្រង់ទ្រាយតូច ព្រោះវិបត្តិកូវីដ-១៩
ទាហានអាមេរិក និងកូរ៉េខាងត្បូង។ រូបភាព៖AFP
×![]()
កូរ៉េខាងត្បូង និងអាមេរិក នៅថ្ងៃទី៨ ខែមីនា ចាប់ផ្តើមសមយុទ្ធយោធាប្រចាំឆ្នាំរួមគ្នាដែលមានរយៈពេល៩ថ្ងៃ។ សមយុទ្ធយោធាឆ្នាំ២០២១នេះ មានទំហំតូចជាឆ្នាំកន្លងមកដោយសារតែវិបត្តិជំងឺកូវីដ-១៩។ បើទោះបីជាសមយុទ្ធនេះមានទំហំតូចយ៉ាងណាក្តី កូរ៉េខាងជើងទំនងជាប្រតិកម្មទៅនឹងសកម្មភាពយោធានេះដូចសព្វដងមិនខាន។
សមយុទ្ធរយៈពេល៩ថ្ងៃរវាងកងទ័ពកូរ៉េខាងជើង និងអាមេរិក ត្រូវធ្វើឡើងក្នុងទម្រង់ជាការបញ្ជាតាមរយៈប្រព័ន្ធកុំព្យូទ័រ និងមានលក្ខណៈជាការការពារទាំងស្រុង។ សមយុទ្ធនេះ ក៏មិនធ្វើនៅលើទីលានឡើយ ដោយសារតែកងទ័ព និងសព្វាវុធត្រូវបានកាត់បន្ថយព្រោះការរឹតបន្តឹងក្នុងការធ្វើដំណើរដែលជាវិធានការទប់ស្កាត់ជំងឺកូវីដ-១៩ នៅកូរ៉េខាងត្បូង។
បើតាមសេចក្តីថ្លែងការណ៍រួមយោធាទាំងពីរនៅថ្ងៃទី៧ ខែមីនា ផ្នែកមួយនៃសមយុទ្ធនេះ គឺជាការធ្វើតេស្តសមត្ថភាពបញ្ជារបស់កងទ័ពកូរ៉េខាងត្បូង។ សមត្ថភាពបញ្ជារបស់កងទ័ពជាចំណុចសំខាន់នៃការផ្ទេរអំណាចអំឡុងពេលសង្គ្រាមពីអាមេរិក មកកូរ៉េខាងត្បូង។ ប្រធានាធិបតីកូរ៉េខាងត្បូង លោក មូន ចចេអ៊ីន ធ្លាប់អះអាងថា ការទទួលបានអំណាចគ្រប់គ្រងទ័ពមកវិញ ជាគោលដៅចម្បងរបស់លោកក្នុងនាមជាប្រមុខរដ្ឋ។
ចាប់តាំងពីសង្គ្រាមកូរ៉េផ្ទុះឡើងពីឆ្នាំ១៩៥០-១៩៥៣មក យោធាអាមេរិករក្សាអំណាចក្នុងការគ្រប់គ្រងទាហានអាមេរិក និងកូរ៉េខាងត្បូងក្នុងករណីសង្គ្រាមផ្ទុះឡើងជាថ្មី។ បច្ចុប្បន្ននេះ អាមេរិកមានទាហានចំនួន២៨,៥០០នាក់កំពុងឈរជើងនៅកូរ៉េខាងត្បូង។
បើទោះបីជាសមយុទ្ធក្នុងសប្តាហ៍នេះ ផ្តល់ឱកាសក្នុងការធ្វើតេស្តសមត្ថភាព និងការត្រៀមខ្លួនបញ្ជាកងដោយកូរ៉េខាងត្បូងក្តី ការពង្រួមទំហំសមយុទ្ធអាចនឹងធ្វើឱ្យការធ្វើតេស្តនេះមានសភាពស្មុគស្មាញជាងមុន និងត្រូវការរយៈពេលយូរជាមុន ខណៈអាណត្តិរបស់លោក មូន នឹងត្រូវបញ្ចប់នៅឆ្នាំ២០២២។ តាំងពីពេលមិនទាន់មានជំងឺឆ្លងកូវីដ-១៩ មក សមយុទ្ធរួមនេះក៏ត្រូវបានធ្វើឡើងក្នុងទ្រង់ទ្រាយតូចទៅហើយដើម្បីសម្រួលការចរចាររឿងរំសាយអាវុធនុយក្លេអែររវាងអាមេរិក និងកូរ៉េខាងជើង។
រាល់ឆ្នាំ កូរ៉េខាងជើងតែងប្រតិកម្មសមយុទ្ធរួមគ្នានេះ ដោយចាត់ទុកជាការត្រៀមឈ្លានពាន្លួន។ ប៉ុន្តែនៅឆ្នាំនេះ ក្រុងព្យុងយ៉ាង ទំនងបន្ថយសំឡេងរបស់ខ្លួន។ លោក Chad O’Carroll នាយកប្រតិបត្តិ Korea Risk Group ដែលឃ្លាំមើលស្ថានការណ៍នៅកូរ៉េខាងជើង និយាយថា លោកមិនរំពឹងព្យុងយ៉ាង នឹងឆ្លើយតបបែបយោធាណាមួយឡើយ។ លោកថា កូរ៉េខាងជើងជាប្រទេសដែលខ្វះខាតធនធាន ដូច្នេះរដ្ឋដ៏ឯកោមួយនេះដោះស្រាយបានតែបញ្ហាមួយមុខប៉ុណ្ណោះ ដែលពេលនេះគឺផលប៉ះពាល់សេដ្ឋកិច្ចដែលបណ្តាលមកពីជំងឺកូវីដ-19៕
Tag:
អាមេរិក
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com
