COVID-19
ជាតិ
សន្តិសុខដែលដោះលែងស្រី្តជនជាតិចិន ត្រូវបានបញ្ជូនទៅតុលាការ
×![]()
ដោយ: ឡាយ សុភាវតី
ភ្នំពេញ៖ បុគ្គលិកសន្តិសុខសណ្ឋាគារសុខាដែលដោះលែងស្រី្តជនជាតិចិន ចេញពីកន្លែងចត្តាឡីស័កត្រូវបានតុលាការបញ្ជូនទៅតុលាការហើយ ដោយត្រូវព្រះរាជអាជ្ញារងដាក់បទចោទពាក់ព័ន្ធនឹង «ចេតនាមិនគោរពបញ្ជារបស់រដ្ឋបាលនៅនឹងកន្លែង»។ 
លោក គុជ គីមឡុង អ្នកនាំពាក្យតុលាការរាជធានីភ្នំពេញអះអាងថា បុរសជាសន្តិសុខត្រូវព្រះរាជអាជ្ញារងសាកសួរ ហើយចោទប្រកាន់តាមមាត្រា៤២នៃច្បាប់ស្ដីពី ការគ្រប់គ្រងគ្រោះមហន្តរាយ។ លោកថ្លែងប្រាប់សារព័ត៌មានថ្មីៗតាមទូរស័ព្ទនៅថ្ងៃនេះថា៖ «គាត់(បុរសសន្តិសុខដែលដោះលែងជនជាតិចិន)ត្រូវបានព្រះរាជអាជ្ញារងសាកសួរហើយ ចោទប្រកាន់បញ្ចូនទៅចៅក្រមស៊ើបសួរហើយ។ ចោទប្រកាន់តាមមាត្រា៤២ នៃច្បាប់គ្រប់គ្រងគ្រោះមហន្តរាយ»។
យោងតាមមាត្រា៤២ នៃច្បាប់ស្ដីពី «ការគ្រប់គ្រងគ្រោះមហន្តរាយ» បានចែងថា អំពើដោយចតនាមិនគោរពបញ្ជារបស់រដ្ឋបាលនៅនឹងកន្លែង ឬគណៈកម្មាធិការគ្រប់គ្រងគ្រោះមហន្តរាយដែលប្រើប្រាស់សិទ្ធិអំណាចរបស់ខ្លួនក្រោមបញ្ញាត្តិ នៃមាត្រា២៥ នៃច្បាប់នេះ ត្រូវផ្តន្ទាទោសដាក់ពន្ធនាគារពី១ខែ ទី១ឆ្នាំ និង/ឬពិន័យជាប្រាក់ពី ១សែនរៀល ទៅ២លានរៀល។
សន្តិសុខវ័យ៣៨ឆ្នាំរូបនេះ ត្រូវបានគេរកឃើញថា ជាអ្នកបើកដៃឲ្យស្ត្រីចិនមួយក្រុមចេញពីសណ្ឋាគារនាអំឡុងពេលនៃការធ្វើចត្តាឡីស័កនៅសណ្ឋាគារសុខា។ បើតាមការអះអាងរបស់សម្តេចនាយករដ្ឋមន្ត្រី ហ៊ុន សែន នាពេលប្រកាសពីព្រឹត្តិការណ៍សហគមន៍២០កុម្ភៈ ស្ត្រីចិន៤នាក់ ត្រូវបានរំដោះចេញពីសណ្ឋាគារ ក្នុងនោះ២នាក់វិជ្ជមានកូវីដ-១៩ ហើយត្រូវបានគេជឿថា ជាប្រភពនៃការរាលដាលព្រឹត្តិការណ៍២០កុម្ភៈ៕
© រក្សាសិទ្ធិដោយ thmeythmey.com
