តាមរយៈសេចក្តីប្រកាសព័ត៌មាន នៅថ្ងៃទី៣ ខែមីនា ក្រសួងប្រៃសណីយ៍ បញ្ជាក់ថា ការប្រើប្រាស់ប្រព័ន្ធនេះ អ្នកស្កេនទាំងអស់ អាចទទួលបានដំណឹងភ្លាមៗ ប្រសិនបើមានករណីពាក់ព័ន្ធនឹងជំងឺកូវីដ-១៩ ហើយម្ចាស់ទីតាំងក៏អាចដឹងពីស្ថានភាពបុគ្គលម្នាក់ៗដែលនៅទីតាំងរបស់ខ្លួនដែរ។ បើតាមក្រសួងប្រៃសណីយ៍ដដែល ទិន្នន័យពីប្រព័ន្ធ QR Code នេះ ក៏បង្ហាញពីបុគ្គលដែលកំពុងធ្វើចត្តាឡីស័កផងដែរ ថាបុគ្គលនោះចេញពីផ្ទះឬទៅទីតាំងណាខ្លះ។
 

ជាមួយគ្នាដែរនេះ ក្រសួងប្រៃសណីយ៍ អំពាវនាវសាធារណៈជនទាំងអស់ចូលរួមទប់ស្កាត់កូវីដ-១៩ តាមរយៈការប្រើប្រាស់ប្រព័ន្ធខាងលើ ពិសេសអ្នកធ្វើចត្តាឡីស័ក មិនត្រូវចេញពីផ្ទះឬកន្លែងចត្តាឡីស័កឡើយ។ 
 

មកដល់ពេលនេះ កម្ពុជាមានករណីកូវីដ-១៩សរុប១០១១នាក់ ដោយ៥០១ករណីពាក់ព័ន្ធនឹងព្រឹត្តិការណ៍សហគមន៍២០កុម្ភៈ។ ក្នុងចំណោម១០១១នាក់នោះ ៥១៧នាក់ហើយ ដែលបានជាសះស្បើយវិញ៕