របាយការណ៍ពីក្រសួងសុខាភិបាល បញ្ជាក់ថា ក្រុមប្រជាពលរដ្ឋអាទិភាពទូទៅ ដែលបានចាក់វ៉ាក់សាំង មានជិត១៣ម៉ឺននាក់ បានចាក់វ៉ាក់សាំងការពារជំងឺកូវីដ-១៩ រួចហើយ ខណៈក្រុមកម្លាំងកងទ័ព មានជាង១០,៧ម៉ឺននាក់ ក៏បានទៅចាក់វ៉ាក់សាំងរួចហើយ ដែរ។ ជាមួយគ្នានេះ ក៏មានពលរដ្ឋជាច្រើនសម្រុកទៅចាក់វ៉ាក់សាំងបង្ការជំងឺកូវីដ-១៩ បន្ទាប់ពីឥទ្ធិពលនៃការឆ្លលរាលដាលជំងឺកូវីដ-១៩ ដែលចេញពីព្រឹត្តិការណ៍សហគមន៍២០កុម្ភៈ កាន់តែមានទំហំធំពីមួយថ្ងៃ ទៅ មួយថ្ងៃ។ 

 

ត្រឹមរយៈពេល២១ថ្ងៃនៃការផ្ទុះឡើងនូវព្រឹត្តិការណ៍២០កុម្ភៈ កម្ពុជាមានមនុស្សរហូតដល់៧១២នាក់ បានដែលឆ្លងជំងឺកូវីដ-១៩ ដោយក្នុងនោះមានបុរសម្នាក់បានស្លាប់ដោយសារតែជំងឺនេះ។ ចំនួនអ្នកឆ្លងនេះ គឺ ស្មើជាង៥៨ភាគរយនៃអ្នកឆ្លងកូវីដ-១៩នៅកម្ពុជា សរុប១,២២៥នាក់។

 

សូមជម្រាបថា កម្ពុជាចាប់ផ្តើមចាក់វ៉ាក់សាំង ប្រភេទស៊ីណូហ្វាមរបស់ចិន តាំងពីទី១០ខែកុម្ភៈ ខណៈការចាក់វ៉ាក់សាំង AstraZeneca របស់អង់គ្លេស ដែលផលិតនៅប្រទេសឥណ្ឌា ចាប់ពីថ្ងៃទី៤មីនាមក។ 

 

ចំពោះវ៉ាក់សាំងស៊ីណូហ្វាម ដែលបានដឹកមកដល់កម្ពុជានៅថ្ងៃទី៧កុម្ភៈ ឆ្នាំ២០២១ អាចចាក់លើមនុស្សអាយុចាប់ពី១៨ឆ្នាំ ដល់៥៩ឆ្នាំប៉ុណ្ណោះ។ រីឯ វ៉ាក់សាំងអាស្ត្រាហ្ស៊ីណិកា (AstraZeneca) សម្រាប់ចាក់លើមន្ត្រី និងពលរដ្ឋអាទិភាពដែលមានអាយុចាប់ពី៦០ឆ្នាំឡើង៕