COVID-19
ជាតិ
×![]()
ដោយ: ខន ចំប៉ា
កម្ពុជា បានរកឃើញករណីកូវីដ-១៩ បំប្លែងថ្មីចំនួន១២ករណីទៀត ក្នុងចំណោមអ្នកឆ្លងក្នុងព្រឹត្តិការណ៍សហគមន៍កន្លងមក។ វិទ្យាស្ថានប៉ាស្ទ័រកម្ពុជា បានបញ្ជាក់លទ្ធផលនេះ នៅថ្ងៃទី១២មីនា។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី១៣មីនានេះ។ 
ពាក់ព័ន្ធនឹងករណីបំប្លែងនេះដែរ នៅព្រឹកថ្ងៃសៅរ៍នេះ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានក្រើនរំឭកសាជាថ្មីថា កូវីដ-១៩ បំប្លែងថ្មីនេះខ្លាំង និងសាហាវជាង វីរុសនាពេលមុនៗ ដែលអាចធ្វើឱ្យអ្នកផ្ទុកស្លាប់បានគ្រប់ពេល។ «សូមចងចាំថា វីរុសបម្លែងថ្មីនេះ សាហាវជាង និងខ្លាំងជាងវីរុសនាពេលមុនៗ ដែលអាចធ្វើឱ្យបុគ្គលស្លាប់បានគ្រប់ពេលវេលា»។ នេះជាសារដែលរដ្ឋលេខាធិការក្រសួងសុខាភិបាលរូបនេះ។
លោកស្រី ឱ វណ្ណឌីន បន្តគូសបញ្ជាក់ទៀតថា វីរុសកូវីដ-១៩ បម្លែងថ្មី កំពុងតែចរាចរយ៉ាងសកម្មខ្លាំងក្លានៅកម្ពុជា ពិសេសនៅរាជធានីភ្នំពេញ និងបានឆ្លងបន្តទៅបណ្តាខេត្តមួយចំនួនរួចទៅហើយ។ ទន្ទឹមនឹងបញ្ជាក់ពីគ្រោះថ្នាក់ ដោយបណ្តាលមកពីករណីបំប្លែងថ្មីហើយ លោកស្រី ឱ វណ្ណឌីន បានអំពាវនាវឲ្យពលរដ្ឋបន្តប្រុងប្រយ័ត្នខ្ពស់ លើស្ថានភាពឆ្លងបច្ចុប្បន្ន ដោយបន្តអនុវត្តវិធានការការពារដែលដាក់ចេញដោយក្រសួងសុខាភិបាល និងប្រមុខរាជរដ្ឋាភិបាល ឱ្យបានខ្ជាប់ខ្ជួន។ លើសពីនេះ លោកស្រីរដ្ឋលេខាធិការ ក៏ទទូចឱ្យពលរដ្ឋចៀសការចល័តពីកន្លែងមួយទៅកន្លែងមួយបើគ្មានការចាំបាច់ និងហាមកន្លែងដែលមានការជួបជុំមនុស្សច្រើន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
គួររំឭកដែរថា កន្លងមកក្រសួងសុខាភិបាល ក៏ធ្លាប់ប្រកាសពីការរកឃើញករណីកូវីដ-១៩ បំប្លែងថ្មីនេះ ៦ ករណីមកហើយដែរ។ សរុប១២ករណីបន្ថែមទៀត នាពេលនេះ ធ្វើឱ្យកម្ពុជាមានករណីកូវីដ-១៩ បំប្លែងថ្មី ១៩ករណី។
សូមបញ្ជាក់ថា គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុប ១២៦៤នាក់។ ករណីសហគមន៍២០កុម្ភៈ មានដល់ទៅ៧៥១នាក់ ដែលស្ថិតក្នុងរាជធានីភ្នំពេញ កណ្តាល ព្រះសីហនុ ព្រៃវែង ស្វាយរៀង កោះកុង កំពង់ធំ កំពង់ចាម សៀមរាប និងបាត់ដំបង។ អ្នកជំងឺចំនួន ៦៣៩នាក់ទៀតកំពុងបន្តសម្រាកព្យាបាល រីឯម្នាក់ បានស្លាប់កាលពីថ្ងៃទី១១ខែមីនា៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
