COVID-19
ជាតិ
វិជ្ជមាន COVID-19 ចំនួន៤១នាក់បន្ថែមទៀតនៅកម្ពុជា
× មនុស្សចំនួន៤១នាក់ទៀត វិជ្ជមានកូវីដ-១៩ នៅកម្ពុជា ដែលមានខ្មែរ ចិន វៀតណាម និងជនជាតិថៃ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលនាព្រឹកថ្ងៃទី១៤ ខែមីនា ឆ្នាំ២០២១ ដែលសុទ្ធតែពាក់ព័ន្ធនឹងករណីសហគមន៍២០កុម្ភៈ។ គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុប១៣០៥នាក់។ ករណីសហគមន៍២០កុម្ភៈ មានដល់ទៅ៧៩២នាក់ ដែលស្ថិតក្នុងរាជធានីភ្នំពេញ កណ្តាល ព្រះសីហនុ ព្រៃវែង ស្វាយរៀង កោះកុង កំពង់ធំ កំពង់ចាម សៀមរាប និងបាត់ដំបង។
តាមសេចក្តីប្រកាសរបស់ក្រសួងសុខាភិបាល អ្នកដែលឆ្លងក្នុងសហគមន៍ទាំង៤១នាក់នេះ មានអ្នករស់នៅភ្នំពេញ១២នាក់ ,កណ្តាល២៨ នាក់ និងខេត្តព្រៃវែង១នាក់។ នៅខេត្តកណ្តាលគឺអ្នកឆ្លងមានអាសយដ្ឋាននៅឃុំសំពៅលូន ស្រុកកោះធំទាំងអស់។ ចំណែកអ្នកនៅរាជធានីភ្នំពេញ អ្នកឆ្លងមានអាសយដ្ឋាន នៅខណ្ឌឫស្សីកែវ ខណ្ឌមានជ័យ ខណ្ឌសែនសុខ ខណ្ឌសែនសុខ ខណ្ឌទួលគោក ខណ្ឌច្បារអំពៅ និងខណ្ឌចំការមន។ រីឯនៅខេត្តព្រៃវែង អ្នកឆ្លងម្នាក់នោះ គឺមានអាសយដ្ឋាននៅឃុំក្រាំងស្វាយ ស្រុកព្រះស្តេច។
ទន្ទឹមនឹងនេះ ក្រសួងក៏បានប្រកាសមានអ្នកសះស្បើយចំនួន២៤នាក់ដែរ ដែលជាអ្នកពាក់ព័ន្ធនឹងព្រឹត្តិការណ៍២០កុម្ភៈ ក្នុងនោះ១១នាក់ ជាអ្នករស់នៅភ្នំពេញ និង១៣នាក់ទៀត ជាជនជាតិចិន និងវៀតណាម ដែលរកឃើញនៅខេត្តព្រះសហនុ។
គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុប១៣០៥នាក់។ ករណីសហគមន៍២០កុម្ភៈ មានដល់ទៅ៧៩២ នាក់ ដែលស្ថិតក្នុងរាជធានីភ្នំពេញ កណ្តាល ព្រះសីហនុ ព្រៃវែង ស្វាយរៀង កោះកុង កំពង់ធំ កំពង់ចាម សៀមរាប និងបាត់ដំបង។ អ្នកជំងឺចំនួន ៦៤៧នាក់ បានសះស្បើយ ខណៈអ្នកចំនួន ៦៥៦ នាក់ទៀត កំពុងបន្តសម្រាកព្យាបាល។ កាលពីថ្ងៃទី១១ខែមីនាកន្លងទៅ មានបុរសម្នាក់បានបាត់បង់ជីវិត៕
© រក្សាសិទ្ធិដោយ thmeythmey.com