សារព័ត៌មានថ្មីៗ បានសង្ខេបព្រឹត្តិការណ៍សំខាន់ៗមួយចំនួន ដែលបានកើតឡើងក្នុងសប្តាហ៍នេះដូចខាងក្រោម៖ 

 

ថ្ងៃទី៨ ខែមីនា
 

ម្ចាស់អាជីវកម្ម និងអ្នករកស៊ីជាច្រើនពាន់នាក់ បានចេញមកបាតុកម្មនៅទូទាំងប្រទេសនៅមីយ៉ាន់ម៉ា ខណៈពេលរបបសឹកនៅតែរក្សាជំហរមិនដោះលែងលោកស្រី អ៊ុងសាន ស៊ូជី។ ទន្ទឹមនេះ អូស្រ្តាលី បានប្រកាសបង្វែរជំនួយមនុស្សធម៌ពីរដ្ឋាភិបាល ទៅអង្គការសង្គមស៊ីវិល និង កម្រិតកម្មវិធីសហប្រតិបត្តិការការពារជាតិទ្វេភាគី និងកម្មវិធីផ្សេងទៀត។ 
 

មេដឹកនាំបាតុកម្មប្រឆាំងរដ្ឋាភិបាលថៃចំនួន១៨រូប ត្រូវបានតុលាការព្រហ្មទណ្ឌថៃ ចោទប្រកាន់ចំពោះការប្រព្រឹត្តបទល្មើសចំនួន១១ ដែលធ្វើឡើងក្នុងបាតុកម្មប្រឆាំងរដ្ឋាភិបាលនៅសាកលវិទ្យាល័យ Thammasat និងទីលាន Sanam Luang កាលពីថ្ងៃទី១៩ និង២០ ខែកញ្ញាឆ្នាំ២០២០។

 

ឥណ្ឌូណេស៊ី បានអនុញ្ញាតឱ្យប្រើប្រាស់បន្ទាន់លើវ៉ាក់សាំង AstraZeneca បន្ទាប់ពីប្រទេសនេះទទួលបានវ៉ាក់សាំង១,១លានដូសតាមយន្តការ COVAX។ 

 

ថ្ងៃទី១០ ខែមីនា
 

ក្រុមប្រឹក្សាសន្តិសុខអង្គការសហប្រជាជាតិ (UNSC) បានអនុម័តជាឯកច្ឆន្ទលើសេចក្តីថ្លែងការណ៍មួយ ដែលរិះគន់យ៉ាងខ្លាំងក្រុមយោធាមីយ៉ាន់ម៉ា និងអំពាវនាវឱ្យរបបសឹក ផ្លាស់ប្តូរស្ថានការណ៍នយោបាយនៅក្នុងប្រទេសទៅរកសភាពដើមវិញ។ ចំណែកអាមេរិក បានបន្ថែមទណ្ឌកម្មមួយចំនួនទៀត។
 

ថ្ងៃទី១១ ខែមីនា
 

សភាប្រជាជនចិន បានអនុម័តសេចក្តីសម្រេចកែប្រែប្រព័ន្ធបោះឆ្នោតហុងកុង ក្នុងសម័យប្រជុំលើកទី៤  នីតិកាលទី១៣ ដោយមានទទួលបានការគាំទ្រក្នុងសំឡេងដ៏ច្រើនលើសលុប។ ក្នុងថ្ងៃដដែល អាមេរិកបានរិះគន់ចិន ដោយចាត់ទុកជាការវាយប្រហារលើប្រជាធិបតេយ្យ។ 
 

រដ្ឋាភិបាលយោធាមីយ៉ាន់ម៉ា បានលុបក្រុមឧទ្ទាម Arakan Army នៅរដ្ឋរ៉ាក់ឃីន ចេញពីបញ្ជីក្រុមភេរវករ ស្របពេលមានបាតុកម្មនៅទូទាំងប្រទេស។ 
 

ថ្ងៃទី១២ ខែមីនា
 

មេដឹកនាំអាមេរិក ជប៉ុន អូស្ត្រាលី ឥណ្ឌា ប្រកាសគម្រោងរួមគ្នាដើម្បីផ្ដល់វ៉ាក់សាំងកូវីដ-១៩ ចំនួនមួយពាន់លានដូសឱ្យតំបន់អាស៊ី ជាមួយគោលដៅប្រជែងចិនដែលផ្គត់ផ្គង់វ៉ាក់សាំងរាប់លានដូសឱ្យប្រទេសក្នុងតំបន់ជាច្រើនមកហើយ។ 
 

អង្គការសុខភាពពិភពលោក (WHO) បានបញ្ចូលវ៉ាក់សាំងកូវីដ-១៩ របស់ក្រុមហ៊ុន Johnson & Johnson ទៅក្នុងបញ្ជីប្រើប្រាស់បន្ទាន់។ 
 

ថ្ងៃទី១៣ ខែមីនា
 

យ៉ាងហោចណាស់មនុស្ស១២នាក់ បានបាត់បង់ជីវិតក្នុងការតវ៉ាប្រឆាំងរដ្ឋប្រហារយោធានៅមីយ៉ាន់ម៉ា។ ទន្ទឹមនេះ មេដឹកនាំរដ្ឋាភិបាលស៊ីវិលស្រមោលដែលកំពុងភៀសខ្លួន ក៏ប្រកាសការតស៊ូមួយដើម្បីបញ្ចប់របបយោធា និងទៅបង្កើតរដ្ឋាភិបាលស្របច្បាប់ថ្មីមួយ៕