បុរសជនជាតិកូរ៉េខាងជើងម្នាក់ នៅថ្ងៃទី៣ ខែមីនាកន្លងទៅ បានចាញ់ក្តីនៅតុលាការកំពូលម៉ាឡេស៊ី ក្នុងការធ្វើបត្យាប័នទៅអាមេរិក ដើម្បីប្រឈមមុខនឹងបទល្មើសលាងលុយកខ្វក់។ បុរសរូបនេះ បានរងបទចោទចំនួន ៤ករណីទាក់ទិននឹងការលាងលុយកខ្វក់ ខណៈកូរ៉េខាងជើងអះអាងថា បុរសរូបនេះ បានរកស៊ីស្របច្បាប់នៅសិង្ហបុរីជាច្រើនឆ្នាំមកហើយ។ 
 

ក្នុងសេចក្តីថ្លែងការណ៍ផ្សាយទីភ្នាក់ងារព័ត៌មាន KCNA នៅថ្ងៃទី១៩ ខែមីនា ក្រសួងការបរទេសកូរ៉េខាងជើង អះអាង អាជ្ញាធរម៉ាឡេស៊ី បានប្រព្រឹត្តឧក្រិដ្ឋកម្មដែលមិនអាចលើកលែងបាន ដោយចាប់បញ្ជូនប្រជាជនកូរ៉េខាងជើងទៅអាមេរិក។ ក្រសួងការបរទេសកូរ៉េខាងជើងលើកឡើងថា តុលាការម៉ាឡេស៊ី មិនមានព័ស្តុច្បាស់លាស់ឡើយដើម្បីដាក់បន្ទុកលើជនជាតិខ្លួនដែលត្រូវបានចោទពីបទល្មើសលាងលុយឡើយ។ 
 

តាមការចុះផ្សាយរបស់ទីភ្នាក់ងារព័ត៌មាន KCNA ក្រុងព្យុងយ៉ាង បន្ថែមថា មិនត្រឹមត្រឹមតែគ្មានព័ស្តុតាងច្បាស់លាស់ទេ មន្ត្រីម៉ាឡេស៊ី ត្រូវបានហៅទៅជួបជុំនៅស្ថានទូតអាមេរិកនៅក្រុងគួឡាឡាំពួថែមទៀត ហើយម៉ាឡេស៊ី បានទទួលទឹកប្រាក់មួយចំនួនថែមទៀត ដែលទង្វើបែបនេះ ត្រូវបានកូរ៉េខាងជើងចាត់ទុកជាការឃុបឃិតគ្នា។ យ៉ាងណាមិញ ក្រសួងការបរទេសកូរ៉េខាងជើង មិនបានបញ្ជាក់ថាតើខ្លួនបានប្រភពនេះមកពីណាឡើយ។ 
 

«កូរ៉េខាងជើង ប្រកាសផ្តាច់ទំនាក់ទំនងការទូតទាំងអស់ជាមួយម៉ាឡេស៊ី»។ ក្រសួងការបរទេសកូរ៉េខាងជើង ប្រកាសបែបនេះដោយផ្ដល់ហេតផលថា ម៉ាឡេស៊ី បានប្រព្រឹត្តទង្វើជាសត្រូវប្រឆាំងនឹងកូរ៉េខាងជើង។ ក្នុងន័យនេះ រដ្ឋាភិបាលក្រុងព្យុងយ៉ាង បានព្រមានអាជ្ញាធរម៉ាឡេស៊ីថា ត្រូវទទួលខុសត្រូវរាល់ផលវិបាកទាំងអស់ ដែលបានកើតឡើងលើប្រទេសទាំងពីរ។ មិនត្រឹមតែព្រមានម៉ាឡេស៊ីមួយឡើយ កូរ៉េខាងជើង ក៏បានគំរាមដាក់អាមេរិកផងដែរថា ទីក្រុងវ៉ាស៊ីនតោន នឹងទទួលផលអាក្រក់ទាំងអស់ ដែលខ្លួនបានប្រព្រឹត្ត។ 
 

សូមបញ្ជាក់ថា ម៉ាឡេស៊ី ជាប្រទេសមួយស្ថិតក្នុងចំណោមប្រទេសផ្សេងទៀត ដែលមានទំនាក់ទំនងការទូតជាមួយកូរ៉េខាងជើង និងមានស្ថានទូតប្រទេសនេះផង៕