ខ្សែប្រយុទ្ធឆ្នើមវ័យ ២៨ ឆ្នាំរូបនេះបានរងរបួសសរសៃពួរក្នុងជំនួបដែល Spurs ចាញ់ Arsenal ២-១ នៅ Premier League កាលពី២សប្តាហ៍មុន ប៉ុន្តែរូបគេនៅតែមានឈ្មោះក្នុងក្រុមរបស់គ្រូបង្វឹក Paulo Bento នៅពេលប៉ះជប៉ុនរបស់គ្រូ Hajime Moriyasu នៅថ្ងៃទី២៥ ខែមិនានេះដែល។
 

របួស Son បានធ្វើឱ្យរូបគេខកខានចូលរួមជាមួយ Spurs ខណៈក្រុមដែលមានលោក Jose Mourinho ជាអ្នកចាត់ការទូទៅនេះបានធ្លាក់ចេញពី Europa League ត្រឹមវគ្គ១៦ក្រុមក្រោមថ្វីជើង Dinamo Zagreb និងមួយប្រកួតទៀតពេលក្រុមទទួលជ័យជម្នះលើក Aston Villa ២-០ ក្នុងក្របខណ្ឌ Premier League នៅថ្ងៃទី២១ ខែមីនា។
 

ដោយសារអវត្តមានសម្រាប់ Spurs ចំនួនពីរប្រកួតចុងក្រោយនេះ ទើបកំពូលកីឡាករល្អបំផុតនៅអាស៊ីរូបនេះ ត្រូវគេដកខ្លួនជាផ្លូវការចេញពីក្រុមជម្រើសជាតិកូរ៉េខាងត្បូង។ ការដកខ្លួន ក៏ស្របតាមការលើកឡើងរបស់អ្នកចាត់ការលោក Mourinho ផងដែរ។ 
 

អ្នកចាត់ការរហស្សនាម Special one ប្រសិនបើ Son ខកខានការប្រកួតលីគជាមួយ Aston Villa មួយលើកទៀត (ដែលប្រកួតរួចហើយដោយ Spurs ឈ្នះ ២-០) នោះរូបគេមិនរំពឹងថានឹងលេងឱ្យកូរ៉េខាងត្បូងនៅទឹកដីជប៉ុនក្នុងជំនួបមិត្តភាពបានឡើយ។ អ្នកចាត់ការសញ្ជាតិព័រទុយហ្គាល់ដែលក្តៅស្លឹកត្រជៀងក្រោយ Spurs ធ្លាក់ពី Europa League ផងនោះ ថែមទាំងបញ្ជាក់ច្បាស់ថា ៖«បើ Son មិនអាចលេងឱ្យក្លិបគាត់បានទៅហើយ នោះក៏មិនអាចលេងឱ្យប្រទេសគាត់បានដែរ»។
 

 
 

ក្រោយឈ្នះ Aston Villa ក្នុងជំនួបលីគសប្តាហ៍ទី២៩ Spurs បានឡើងទៅកាន់ចំណាត់ថ្នាក់ទី៦ និងកើនឱកាសដើម្បីប្រជែងតំបន់ Top 4 ឡើងវិញផងដែរ។ Spurs រកបាន៤៩ពិន្ទុ តាមពីក្រោយក្រុមលេខ៤ Chelsea តែ៣ពិន្ទុប៉ុណ្ណោះ៕