ចម្លើយ ពីលោកសាស្ត្រាចារ្យវេជ្ជបណ្ឌិត តាន់ តឹកស្រេង គឺថា គ្មានការសិក្សាច្បាស់លាស់ណាមួយបង្ហាញថា មនុស្សមានឈាម O មិនឆ្លងកូវីដ-១៩ទេ។ ហើយបើសិនជាមនុស្សមានឈាម O ពិតជាមិនឆ្លងឬមិនងាយឆ្លងជំងឺកូវីដ-១៩មែន ក៏មិនត្រូវផ្សព្វផ្សាយដំណឹងនេះនៅក្នុងកាលៈទេសៈនៃការឆ្លងរាលដាលកូវីដ-១៩នៅក្នុងសហគមន៍ឡើយដែលធ្វើឱ្យមនុស្សមាន O ធ្វេសប្រហែសពីការបង្ការកូវីដ-១៩នេះ។ 

 

លោក វេជ្ជបណ្ឌិត តាន់ តឹកស្រេង មានប្រសាសន៍ប្រាប់សារព័ត៌មានថ្មីៗនាព្រឹកថ្ងៃទី២៣មីនា ឆ្នាំ២០២១ដូច្ន៖«ទោះជា[មានការសិក្សាណាមួយបង្ហាញថា មនុស្សមានឈាមO មិនឆ្លងកូវីដ-១៩។ វាពិតក៏ដោយ វាមិនបាន១០០ភាគរយដែរ...ដោយមនុស្សមានឈាមប្រភេទOនោះ ក៏ត្រូវចាក់វ៉ាក់សាំងបង្ការជំងឺកូវីដ-១៩ ផងដែរ»៕ 

 

ជុំវិញបញ្ហានេះផងដែរ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល បានប្រាប់សារព័ត៌មានថ្មីៗ ថា បច្ចុប្បន្ននេះមិនទាន់មានការសិក្សាស្រាវជ្រាវណាមួយជាវិទ្យាសាស្ត្រច្បាស់លាស់ដែលបានចែងឡើយ ហើយអង្គការសុខភាពពិភពលោកក៏មិនទាន់និយាយអំពីបញ្ហានេះដែរ។លោកស្រី ឱ វណ្ណឌីន មានប្រសាសន៍ដូច្នេះ៖ «ត្រង់កន្លែងនេះ គឺយើងត្រូវឱ្យច្បាស់ទាំងអស់គ្នា! ហើយយើងឃើញហើយ ថាវីរុសកូវីដ-១៩នេះ វាយលុកដោយគ្មានរើសមុខទេ!​ ។ យើងកុំគិតថា យើងមានឈាម O មិនឆ្លងឬមានហានិភ័យទាបឆ្លងកូវីដ-១៩នោះ! សូមកុំយល់បែបនេះ ហើយត្រូវនាំគ្នាប្រុងប្រយ័ត្ននិងការពារចំពោះជំងឺនេះ ទាំងអស់គ្នា»៕