កីឡាការិនីសញ្ជាតិអូស្រ្តាលីរូបនេះ ទទួលបានអារម្មណ៍រំភើបយ៉ាងខ្លាំង បើទោះនៅចំថ្ងៃបញ្ចប់អាជីពបាល់ទាត់របស់នាងក៏ដោយ។ នៅក្រោយបញ្ចប់ការប្រកួតចុងក្រោយដែល Melbourne City យកឈ្នះក្រុម Perth Glory ២-១ ក្នុងជំនួបលីគកំពូលអូស្ត្រាលី W-League នៅថ្ងៃទី២៥ ខែមីនា មិត្តប្រុសរបស់ Dobson លោក Matt Stonham បានយកជញ្ជៀនពេជ្រទៅកាន់ទីលានហើយលុតជង្គង់សុំនាងរៀបការ។ Dobson បានស្រក់ទឹកភ្នែក ហើយយល់ព្រមទទួលយកជញ្ជៀនទាំងរំភើប។
 

Dobson ដែលធ្លាប់បង្ហាញខ្លួនឱ្យក្រុមជម្រើសជាតិស្ត្រីអូស្ត្រាលីមួយលើក បានប្រាប់មិត្តរួមក្រុម Melbourne នៅមុនថ្ងៃប្រកួតនេះ ថាខ្លួននឹងចូលនិវត្តន៍ដើម្បីយកពេលជួយមិត្តប្រុស ដែលត្រូវព្យាបាលជំងឺមហារីកខួរក្បាល។ លោក Matt Stonham ត្រូវទទួលការព្យាបាលដោយប្រើវិទ្យុសកម្ម និងការព្យាបាលដោយប្រើគីមីសម្រាប់ជំងឺមហារីកនេះ។


 

Dobson ដែលទើបមានវ័យ២៨ឆ្នាំ បានរៀបរាប់នៅក្រោយចប់ការប្រកួត និងក្រោយទទួលជញ្ជៀនពីមិត្តប្រុស ជុំវិញការបញ្ចប់អាជីពរបស់ខ្លួនថា៖ «សេចក្តីស្រឡាញ់ គឺធំជាងកីឡា។ គាត់គឺជាពិភពលោកផ្តាច់មុខរបស់ខ្ញុំ។ ខ្ញុំត្រូវមើលថែទាំគាត់អំឡុងពេលនេះ»។
 

លោក Stonham ត្រូវបានរកឃើញថាមានជំងឺមហារីកកាលពី៦ឆ្នាំមុន បន្ទាប់លោកប្រកាច់ពេលកំពុងលេងបាល់ទាត់។ លោកទទួលការវះកាត់ជាលើកទី២កាលពីដើមខែមីនានេះ ហើយនឹងបន្តព្យាបាលដោយប្រើវិទ្យុសកម្ម មុនពេលការព្យាបាលដោយប្រើគីមី៕