អំពើហិង្សាលើបាតុករមីយ៉ាន់ម៉ាពីសំណាក់យោធាប្រទេសនេះ ធ្វើឱ្យប្រមុខកងទ័ពប្រទេសចំនួន១២ មកពីអាស៊ី អាមេរិក និងអឺរ៉ុបចេញសេចក្ដីថ្លែងការណ៍រួមដ៏កម្រមានមួយ។ អគ្គមេបញ្ជាការកងទ័ពអូស្ត្រាលី កាណាដា ដាណឺម៉ាក អាល្លឺម៉ង់ ក្រិក ហូឡង់ កូរ៉េខាងត្បូង អ៊ីតាលី ជប៉ុន នូវែលសេឡង់ ចក្រភពអង់គ្លេស និងអាមេរិក បានរួមគ្នាថ្កោលទោសសកម្មភាពឃោរឃៅរបស់យោធាមីយ៉ាន់ម៉ាលើបាតុករស៊ីវិល។  

 

«ជាអគ្គមេបញ្ជាការកងទ័ព យើងថ្កោលទោសការប្រើកម្លាំងឃោរឃៅលើប្រជាជនគ្មានអាវុធពីសំណាក់យោធាមីយ៉ាន់ម៉ា និងកម្លាំងសន្តិសុខក្រោមចំណុះ។ យោធាមានវិជ្ជាជីវៈ ត្រូវអនុវត្តតាមបទដ្ឋានអន្តរជាតិ និងទទួលខុសត្រូវការពារ មិនមែនធ្វើបាបប្រជាជនដែលខ្លួនបម្រើ។» នេះជាសេចក្ដីថ្លែងការណ៍រួមរបស់ប្រមុខកងទ័ពទាំង១២ប្រទេស ដែលបានស្នើឱ្យកងទ័ពមីយ៉ាន់ម៉ាបញ្ឈប់អំពើហិង្សា និងស្ដារមុខមាត់ដែលបាត់បង់ដោយសកម្មភាពរបស់ខ្លួនឡើងវិញ។

 

យ៉ាងណាមិញ ក្នុងសេចក្ដីថ្លែងការណ៍រួមនេះ មេទ័ពកំពូលរបស់ប្រទេស១២ខាងលើ មិនបាននិយាយដល់រដ្ឋប្រហារថ្ងៃទី១ ខែកុម្ភៈឡើយ។ សេចក្ដីថ្លែងការណ៍នេះ ក៏ចេញក្រោយមនុស្សយ៉ាងហោចណាស់១១៤នាក់ ស្លាប់ការបង្ក្រាបរបស់កម្លាំងសន្តិសុខនៅថ្ងៃទី២៧ ខែមីនា ដែលជាទិវាកងទ័ពដ៏សំខាន់ផងនោះ។ នេះជាថ្ងៃបង្ហូរឈាមបំផុតមួយនៅមីយ៉ាន់ម៉ាតាំងពីរដ្ឋប្រហារទម្លាក់រដ្ឋាភិបាលរបស់បក្សសម្ពន្ធជាតិដើម្បីប្រជាធិបតេយ្យមក។

 

បច្ចុប្បន្ន របបសឹកមួយនេះ ក៏កំពុងរងសម្ពាធខ្លាំងពីអន្តរជាតិ ខណៈមេដឹកនាំជាច្រើននាក់រាប់ទាំងអគ្គមេបញ្ជាការកងទ័ព ឧត្តសេនីយ៍ មីន អ៊ុងឡាំង ផង ស្ថិតក្រោមទណ្ឌកម្មរបស់អាមេរិក និងអង់គ្លេស។ ប្រទេសខ្លះក៏ផ្អាកទំនាក់ទំនងផ្នែកកងទ័ពដូចជានូវែលសេឡង់ និងកូរ៉េខាងត្បូងជាដើម៕