ក្នុងចំណោមករណីឆ្លងថ្មី៦៦៨នាក់ដែលរកឃើញសម្រាប់ថ្ងៃទី៦ ខែមេសា ករណីចំនួន៦៥៣ ជាការឆ្លងក្នុងស្រុក ដែលនាំឱ្យករណីឆ្លងនៅកូរ៉េខាងត្បូងមានដល់១០៦៨៩៨នាក់។ នេះបើតាមរបាយការណ៍របស់ទីភ្នាក់ងារគ្រប់គ្រងជំងឺឆ្លងកូរ៉េ (KCDA) នៅថ្ងៃទី៧ ខែមេសា។ តួលេខប្រចាំថ្ងៃនេះ ខ្ពស់ជាងតួលេខថ្ងៃទី៨ ខែមករា ដែលមាន៦៧៤នាក់។

 

ក្នុងរបាយការណ៍ដដែល ករណីឆ្លងប្រមាណ៦៣ភាគរយ រកឃើញនៅរដ្ឋធានីសេអ៊ូល និងតំបន់ជុំវិញដូចជាខេត្ត Gyeonggi ជាដើម។ 

 

នាយករដ្ឋមន្រ្តីកូរ៉េខាងត្បូង Chung Sye-kyun និយាយអំឡុងកិច្ចប្រជុំរដ្ឋាភិបាលថា ប្រសិនរលកឆ្លងទីបួនក្លាយជាការពិត កម្មវិធីចាក់វ៉ាក់សាំងរបស់រដ្ឋនឹងត្រូវរាំងស្ទះ ហើយប៉ះពាល់សេដ្ឋកិច្ចធ្ងន់ធ្ងរ។ លោក Chung អះអាងថា រដ្ឋាភិបាលប្រមូលកម្លាំងធនធានទាំងអស់ដើម្បីទប់ស្កាត់រលកឆ្លងទីបួននេះ។

 

គិតតាំងពីខែកុម្ភៈមក កូរ៉េខាងត្បូងចាក់វ៉ាក់សាំងលើមនុស្សច្រើនជាងមួយលាននាក់ ដែលជាក្រុមអាទិភាពដូចជាគ្រូពេទ្យ បុគ្គលិកសុខាភិបាល និងមនុស្សចាស់។ ប៉ុន្តែយុទ្ធនាការនេះ រងសម្ពាធខ្លាំងដោយសារការពឹងផ្អែកខ្លាំងពេកលើវ៉ាក់សាំងតាមយន្តការ COVAX ។ យន្តការ COVAX ផ្ទាល់ ក៏ជួបការពន្យារពេលក្នុងដឹកជញ្ជូនដែរ៕