ក្រសួងសុខាភិបាលបានបញ្ជាក់ថា ក្នុងចំណោមមនុស្សជាង៨១ម៉ឺននាក់ខាងលើ ដែលបានចាក់វ៉ាក់សាំងបង្ការកូវីដ-១៩ មាន៦១៥,៥២៨នាក់ ជាក្រុមពលរដ្ឋអាទិភាព និង២០០,៤៤៦នាក់ទៀត ជាកងកម្លាំងយោធា ខណៈរដ្ឋាភិបាល និងក្រសួង-ស្ថាប័នពាក់ព័ន្ធទាំងឡាយ បន្តអំពាវនាវដល់ពលរដ្ឋអាទិភាពឱ្យមកទទួលវ៉ាក់សាំងបង្ការជំងឺនេះ នៅតាមមូលដ្ឋានរៀងៗខ្លួន នៅទូទាំងប្រទេស។

 

បើផ្អែកតាមជំរឿនទូទៅនៃប្រជាជនកាលពីឆ្នាំ២០១៩ កម្ពុជាមានពលរដ្ឋជាង១៥,៥៥លាននាក់ ដូច្នេះមានន័យថា ពលរដ្ឋជាង៥,២ភាគរយហើយដែលបានចាក់វ៉ាក់សាំងកូវីដ-១៩ ដូសទីមួយ ហើយជាង១,៦ភាគរយ បានចាក់ដូសទីពីរ។ ក្រៅពីពលរដ្ឋខ្មែរ ជនបរទេសរួមមានអត្តពលិក មន្ត្រីអង្គការអន្តរជាតិ មន្ត្រីទូតបរទេស ក៏ទទួលបានការចាក់វ៉ាក់សាំងកូវីដ-១៩ ដោយឥតគិតថ្លៃនៅកម្ពុជាផងដែរ។

 

បច្ចុប្បន្ន កម្ពុជា មានវ៉ាក់សាំងចំនួន៣ប្រភេទ ដែលកំពុងផ្តល់ឱ្យពលរដ្ឋ។ ក្នុងនោះ កម្ពុជាចាប់ផ្តើមចាក់វ៉ាក់សាំងដំបូកជូនដល់ពលរដ្ឋដើម្បីបង្ការជំងឺកូវីដ-១៩នោះ គឺវ៉ាក់សាំងរបស់ក្រុមហ៊ុនSinopharm ចំពោះមនុស្សវ័យពី១៨ឆ្នាំ ដល់៥៩ឆ្នាំ តាំងពីថ្ងៃទី១០កុម្ភៈ ឆ្នាំ២០២១ មកដល់ ថ្ងៃទី៤មីនា កម្ពុជា ក៏បានចាប់ផ្តើមចាក់វ៉ាក់សាំង COVISHIELD លើមន្ត្រី និងពលរដ្ឋអាទិភាព ដែលមានអាយុចាប់ពី៦០ឆ្នាំឡើង។ រហូតដល់ថ្ងៃទី១មេសា កម្ពុជា បានចាក់សាំងវ៉ាក់សាំងSinovac ទៅលើមនុស្សដែលមានវ័យចាប់ពី១៨ឆ្នាំឡើង ទៅផងដែរ។