COVID-19
ជាតិ
រដ្ឋបង់ថ្លៃភ្លើង និងទឹក ៥ខែដល់គ្រួសារដែលមានសមាជិកស្លាប់ដោយសារកូវីដ-១៩
× សម្តេចនាយករដ្ឋមន្ត្រី ហ៊ុន សែន បានថ្លែងសារពិសេស តាមរយៈទូរទស្សន៍ជាតិកម្ពុជា នាព្រឹកថ្ងៃទី១០ ខែមេសា នេះ ទាក់ទងនឹងស្ថានភាពរាលដាលកូវីដ-១៩ នៅកម្ពុជា។ សម្តេច ហ៊ុន សែន បានសម្រេចអន្តរាគមន៍ចំពោះអ្នកស្លាប់ដោយសារករណី២០កុម្ភៈ រដ្ឋជួយបង់ជំនួសការប្រើប្រាស់ទឹកស្អាត ថ្លៃអគ្គិសនី ក្នុងរយៈពេល៥ខែ បើគិតចាប់តាំងពីទទួលមរណភាព។ កន្លងទៅ សមាជិកក្រុមគ្រួសារអ្នកស្លាប់បានប្រាក់ឧបត្ថម្ភ១០លានរៀល និងអង្ករ១០០គីឡូក្រាម។
មកដល់បច្ចុប្បន្ន អ្នកស្លាប់មាន២៥នាក់ ក្នុងនោះមាន៣នាក់ជាជនបរទេស។ រដ្ឋរ៉ាប់រង សម្រាប់តែពលរដ្ឋខ្មែរប៉ុណ្ណោះ។
ក្រៅពីជួយសម្រាកបន្ទុកដល់ក្រុមគ្រួសារដែលបានបាត់បង់ជីវិតដោយសារជំងឺកូវីដ-១៩ រដ្ឋាភិបាល ក៏នឹងអន្តរាគមន៍ដល់អ្នកបានឆ្លង និងកំពុងព្យាបាលជំងឺនេះដែរ។ បើតាមប្រមុខរដ្ឋាភិបាលកម្ពុជា សម្រាប់សមាជិកគ្រួសារ ដែលមានអ្នកកើតកូវីដ-១៩ ដោយមានការបញ្ជាក់ត្រឹមត្រូវ រដ្ឋនឹងជួយបង់ថ្លៃទឹក ភ្លើង ក្នុងកម្រិតអប្បបរមាមួយ រយៈពេល៣ខែ ចាប់ពីខែដែលសមាជិកម្នាក់ ឬច្រើនបានឆ្លងជំងឺ។
ទន្ទឹមនឹងនេះ ចំពោះគ្រួសារដែលរងការធ្វើចត្តាឡីស័ក ឬរងការរាំងខ្ទប់ ក៏រដ្ឋាភិបាលទទួលអន្តរាគមន៍ដែរ ដោយរដ្ឋ នឹងឧបត្ថម្ភប្រាក់ឧបត្ថម្ភ៣០ម៉ឺនរៀល ហើយទទួលបានការបង់ថ្លៃទឹកភ្លើងរយៈពេល២ខែ ក្នុងកម្រិតអប្បបរមាមួយ។
សម្រាប់គ្រួសារដែលនៅក្រៅតំបន់បិទខ្ទប់ ហើយកំពុងធ្វើចត្តាឡីស័កវិញ ក៏ទទួលបានប្រាក់ឧបត្ថម្ភប្រាក់ ៣០ម៉ឺនរៀល និងទទួលបាននូវការរ៉ាប់រងភ្លើងទឹក រយៈពេល២ខែពីរដ្ឋដូចគ្នាដែរ។ ក្រៅពីនេះ ពួកគាត់ទទួលបានការឧបត្ថម្ភពីរដ្ឋដូចជាអង្គរ មី និងត្រីខផងដែរ។
សម្តេច ហ៊ុន សែន ក៏អរគុណផងដែរ សម្រាប់អ្នកមានជីវភាពធូរធាមួយចំនួន ដែលមិនទទួលយកប្រាក់ឧបត្ថម្ភពីរដ្ឋ ដើម្បីឲ្យរដ្ឋមានលទ្ធភាព ផ្តល់ការឧបត្ថម្ភបន្ថែមដល់អ្នកខ្វះខាត៕
© រក្សាសិទ្ធិដោយ thmeythmey.com