COVID-19
ជាតិ
សម្តេច ហ៊ុន សែន៖ វ៉ាក់សាំងកាតព្វកិច្ចសម្រាប់មន្ត្រីរាជការ កម្លាំងប្រដាប់អាវុធ និងមន្ត្រីកិច្ចសន្យា
× គិតមកដល់ពេលនេះ កម្ពុជាអ្នកចាក់វ៉ាក់សាំងកូវីដ-១៩ មានជិត១លាននាក់ក្នុងចំណោមពលរដ្ឋជិត១៦លាននាក់។ សម្តេចនាយករដ្ឋមន្ត្រី ហ៊ុន សែន បានបញ្ជាក់ថា នេះជាដំណើរការដ៏ល្អមួយ។
នៅថ្ងៃទី១៧ ខែមេសា កម្ពុជានឹងបានកន្លះលានដូសទៀត ខែឧសភា នឹងបានចំនួន១,៥ដូស ខែមិថុនា នឹងមកដល់៣លានដូស ខែកក្កដា នឹងមកដល់២លានដូស និងសីហា នឹងបាន១លានដូស។ «គេថាខ្ញុំរំលោភលើគោលការណ៍ស្ម័គ្រចិត្ត តែក្នុងនាមជាប្រមុខរដ្ឋាភិបាល ខ្ញុំមានភារកិច្ចដាក់ជាវ៉ាក់សាំងកាតព្វកិច្ច អ្នកចង់និយាយថាអី ថាទៅ»។ នេះជាការលើកឡើងរបស់សម្តេច ហ៊ុន សែន។
«អ្នកឯងគិតពីសិទ្ធិមនុស្សម្នាក់ដែលនិយាយបំភ្លៃ តែខ្ញុំគិតពីសិទ្ធមនុស្សរាប់លាននាក់ដែលត្រូវការរស់»។ សម្តេចប្រតិកម្មទៅនឹងក្រុមសិទ្ធិមនុស្សដែលចោទប្រកាន់សម្តេចទាក់ទងនឹងការចាប់មនុស្សដែលផ្សាយព័ត៌មានបំភ្លៃទាក់ទងនឹងកូវីដ-១៩។
ទាក់ទងនឹងវ៉ាក់សាំង សម្តេចអះអាងថា ពិភពលោកកំពុងអនុវត្តវ៉ាក់សាំងកាតាព្វកិច្ច ជាពិសេសវ៉ាក់សាំងការទូត និងការបន្ធូរបន្ថយគោលការណ៍ចត្តាឡីស័កមួយចំនួនសម្រាប់អ្នកដែលបានចាក់វ៉ាក់សាំងរួច។
សម្រាប់មន្ត្រីរាជការស៊ីវិល កងកម្លាំងប្រដាប់អាវុធ និងមន្ត្រីជាប់កិច្ចសន្យា ការចាក់វ៉ាក់សាំងកូវីដ-១៩ ជាកាតាព្វកិច្ច ខណៈពលរដ្ឋនៅតែរក្សាគោលការណ៍ស្ម័គ្រចិត្ត៕
© រក្សាសិទ្ធិដោយ thmeythmey.com