COVID-19
ជាតិ
សម្ដេច ហ៊ុន សែន ឱ្យអភិបាលរាជធានីខេត្ត យកចិត្តទុកដាក់លើព្រះសង្ឃដែលអត្តខាត់ដោយសារកូវីដ-១៩ រូបភាពដោយ ព្រះភិក្ខុ ជិន ភិរម្យ ចៅអធិការស្ដីទីវត្តលម្អងបុទុម ដែលស្ថិតលើភ្នំបាយសី ស្រុកសាលាក្រៅ ខេត្តប៉ៃលិន។
× សម្ដេច ហ៊ុន សែន បានប្រាប់ឱ្យអភិបាលរាជធានី ខេត្តទាំងអស់យកចិត្តទុកដាក់ចំពោះវត្តអារាម និងព្រះសង្ឃ ដែលអត្តខាត់ នៅអំឡុងពេការរីករាលដាលនៃជំងឺកូវីដ-១៩ ជាពិសេសនៅរាជធានីភ្នំពេញ និងនៅក្រុងតាខ្មៅ ដែលជាតំបន់បិទខ្ទប់។ នេះបើតាមសារសំឡេងរបស់សម្តេច ហ៊ុន សែន ដែលត្រូវបានផ្សព្វផ្សាយនៅយប់ថ្ងៃទី ២០មេសានេះ។
ប្រមុខរដ្ឋាភិបាល បានស្នើយ៉ាងដូច្នេះ៖ «សុំឱ្យរាជធានី និងខេត្តយកចិត្តទុកដាក់ទៅលើព្រះសង្ឃ ដែលជួបការលំបាក ដែលមិនអាចចេញបិណ្ឌបាត្របាននៅតាមទីកន្លែងដែលត្រូវបិទខ្ទប់។ ជាពិសេសនៅរាជធានីភ្នំពេញ និងនៅក្រុងតាខ្មៅ ដែលប្រជាជនមិនអាចចេញក្រៅបាន ហើយព្រះសង្ឃក៏មិនអាចបិណ្ឌបាត្របាន»។
ក្រៅពីនេះ ប្រមុខរដ្ឋាភិបាលក៏អំពាវនាវ ឱ្យអភិបាលខេត្តនានា គិតគូរលើសមណសិស្ស ដែលសិក្សា និងអាស្រ័យនៅក្នុងវត្ត ដែលកំពុងជួបការលំបាកដោយសារខ្វះស្បៀង ក្នុងដំណាក់កាលកូវីដ-១៩ នេះផងដែរ។
គួរកត់សម្គាល់ថា កន្លងមកមានវត្តមួយចំនួន នៅតាមបណ្តាខេត្តអត្តខាតចង្ហាន់ដោយសារព្រឹត្តិការណ៍សហគមន៍២០កុម្ភៈ។ ព្រឹត្តិការណ៍សហគមន៍២០កុម្ភៈបានផ្ទុះចេញពីរាជធានីភ្នំពេញ ហើយបន្តរាលដាលដល់ខេត្តជាច្រើនរួមមាន ខេត្តកណ្តាល ព្រះសីហនុ ព្រៃវែង ស្វាយរៀង សៀមរាប ត្បូងឃ្មុំ កំពង់ធំ កំពង់ចាម កែប តាកែវ បាត់ដំបង កំពត កំពង់ឆ្នាំង ពោធិ៍សាត់ ក្រចេះ ព្រះវិហារ និងខេត្តកំពង់ស្ពឺ។
រយៈពេល ២ខែមកនេះ មានមនុស្សចំនួន ៦៨៩៩នាក់ ត្រូវបានរកឃើញថាមានវិជ្ជមានកូវីដ-១៩ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ ហើយមានអ្នកស្លាប់ចំនួន ៤៩នាក់៕
© រក្សាសិទ្ធិដោយ thmeythmey.com