រដ្ឋបាលរបស់លោកប្រធានាធិបតីអាមេរិក ចូ បៃឌិន បានផ្តល់សញ្ញាវិជ្ជមាននៅដើមឆ្នាំនេះថាខ្លួនគ្មានផែនការរារាំងអត្តពលិកអាមេរិកចូលរួមក្នុងព្រឹត្តិការណ៍កីឡានៅទីក្រុងប៉េកាំងឡើយ។ មួយវិញទៀត អាមេរិកក៏នឹងមិនយកព្រឹត្តិការណ៍កីឡាទៅពាក់ព័ន្ធ នឹងបញ្ហាសិទ្ធិមនុស្ស ឬនយោបាយជាមួយប្រទេសដទៃនោះដែរ។
 

ស្របពេលគ្នានេះ សមាជិកព្រឹទ្ធសភាគណបក្សសាធារណរដ្ឋមួយចំនួន ព្រមទាំងក្រុមសិទ្ធិមនុស្ស បានអំពាវនាវឱ្យរដ្ឋបាលលោកបៃឌិន ធ្វើពហិការចូលរួមអូឡាំពិករដូវរងាជុំវិញសំណុំរឿងសិទ្ធិមនុស្សនៅស៊ីនជាំង និងការបង្ក្រាបនៅហុងកុង។ ចិន រងការរិះគន់ខ្លាំងជុំវិញការប្រព្រឹត្តរបស់ខ្លួនលើជនជាតិមូស្លីមវីហ្គ័រនៅស៊ីនជាំង រហូតអាមេរិក និងសម្ពន្ធមិត្តដាក់ទណ្ឌកម្មប្រទេសយក្សអាស៊ីនេះទៀតផង។
 

ខណៈការអំពាវនាវនេះមិនទទួលបានជោគជ័យ សមាជិកសភាអាមេរិក និង UCIRF ស្នើឱ្យអាមេរិកកុំបញ្ជូនតំណាងរដ្ឋាភិបាល ឬមន្ត្រីមួយចំនួនចូលរួមព្រឹត្តិការណ៍កីឡានៅប៉េកាំងវិញ។ 

UCIRF នៅក្នុងរបាយការណ៍ប្រចាំឆ្នាំបានលើកទឹកចិត្តឱ្យក្រុងវ៉ាស៊ីនតោនបន្តដាក់ទណ្ឌកម្មផ្នែកហិរញ្ញវត្ថុ និងទិដ្ឋការដែលមានគោលដៅលើទីភ្នាក់ងាររដ្ឋាភិបាលចិន និងមន្រ្តីដែលទទួលខុសត្រូវចំពោះការរំលោភបំពាននេះ៕