តាមរយៈសេចក្តីប្រកាសព័ត៌មានរបស់ WHO នៅថ្ងៃទី២៥ មេសា អ្នកស្រី លី អៃឡាន បានមានប្រសាសន៍ដូច្នេះ ៖«​វាមិនទាន់យឺតពេលក្នុងការបង្វែរស្ថានការណ៍ឱ្យល្អប្រសើរឡើងវិញបាន។ យើងនៅតែសង្ឃឹមជានិច្ចថា ដរាបណាកម្ពុជារួមគ្នាធ្វើសកម្មភាពជាធ្លុងមួយ ជាប្រជាជាតិមួយ និងសង្គមតែមួយ ដែលប្តេជ្ញាចិត្តប្រយុទ្ធប្រឆាំង នឹងជំងឺកូវីដ-១៩ ដោយសាមគ្គីភាព»។

 

សម្រាប់ អ្នកស្រី លី អៃឡាន ដើម្បី​អាចដោះស្រាយបញ្ហារាតត្បាត នៃជំងឺកូវីដ-១៩ ​ដោយប្រសិទ្ធភាព ចាំបាច់ណាស់ត្រូវមានធាតុផ្សំចំនួន ៣ នោះគឺ​ថ្នាក់ដឹកនាំ ត្រូវតែបោះជំហានទៅមុខក្នុងការសម្រេចចិត្ត និងដាក់ចេញនូវវិធានការ ហើយទី២ សង្គមទាំងមូលត្រូវតែចូលរួម និងទី៣ពលរដ្ឋគ្រប់គ្នា ត្រូវប្រកាន់ខ្ជាប់ និងអនុវត្តតាមវិធានការសុខាភិបាល​ទដែលបានដាក់ចេញ។

 

«នៅពេលដែលសមាសធាតុទាំងអស់នេះរួមគ្នា គេអាចបញ្ឈប់កំណើន និងកាត់បន្ថយការចម្លងបាន»។ នេះជាការបន្ថែមរបស់ អ្នកស្រី លី អៃឡាន តំណាងអង្គការសុខភាពពិភពលោកប្រចាំប្រទេសកម្ពុជា ដោយបានបន្តបន្ថែមថា ការសម្រេចិត្តទ្រង់ទាយតូចៗប្រចាំថ្ងៃ របស់បុគ្គលគ្រប់រូប ដូចជាការកន្លែងគួរទៅ ឬមិនគួរទៅ ឬពេលណាគួរទៅធ្វើការ ឬមិនគួរនោះ គឺអាចកំណត់ពីជោគជ័យ ឬបរាជ័យរបស់ប្រទេសកម្ពុជា ក្នុងការបញ្ឈប់ការចម្លងនៃជំងឺកូវីដ-១៩បាន។ 

 

សូមជម្រាបថា បច្ចុប្បន្នកម្ពុជា គិតមកដល់ពេលនេះ កម្ពុជារកឃើញករណីវិជ្ជមានកូវីដ-១៩ ជិត ១ម៉ឺនករណី ជាង៩៤០០ករណី ​ពាក់ព័ន្ធនឹងសហគមន៍២០កុម្ភៈ។ អ្នកសះស្បើយមាន​៣ ៤០០នាក់ ខណៈចំនួនអ្នកស្លាប់ឡើងដល់​៧៤នាក់៕

 

​