COVID-19
ជាតិ
ភូមិចំនួន ៨ នៅខេត្តកណ្ដាល ត្រូវបានកំណត់ជាតំបន់ក្រហម លឿងទុំ និងលឿង
×
ដោយ៖ ប៉ូ សុភា
ភ្នំពេញ៖ រដ្ឋបាលខេត្តកណ្ដាលបានសម្រេចកំណត់ដាក់ភូមិចំនួន៨ ស្ថិតនៅឃុំចំនួន២ ជាតំបន់លឿង លឿងទុំ និងក្រហម។នេះបើយោងតាមសេចក្តីជូនដំណឹង រដ្ឋបាលខេត្តកណ្ដាល នៅថ្ងៃទី៣០ មេសា ឆ្នាំ២០២១។
រដ្ឋបាលខេត្តកណ្ដាល បានបញ្ជាក់ថា ភូមិស្វាយជ្រុំ ភូមិពង់ទឹក ភូមិត្នោតម្ដើម ភូមិអណ្ដូង នៃឃុំបែកចាន ស្រុកអង្គស្នួល ត្រូវបានកំណត់ជា«តំបន់ក្រហម» ចាប់ពីថ្ងៃទី១ ខែឧសភា ដល់ថ្ងៃទី១៤ ខែឧសភា ឆ្នាំ២០២១។ ដូច្នេះពលរដ្ឋដែលរស់នៅក្នុងភូមិទាំង៤ខាងលើ ត្រូវបានហាមឃាត់មិនឱ្យធ្វើដំណើរចេញពីលំនៅឋាន ឬ ទីសំណាក់បច្ចុប្បន្នឡើយ ដោយរួមទាំង ការមិនអនុញ្ញាតឱ្យធ្វើសកម្មភាពកីឡា នៅខាងក្រៅលំនៅឋាន ឬទីសំណាក់ពួកគេ ។ ប៉ុន្ដែ ការធ្វើដំណើរចេញក្រៅពីលំនៅឋាន ឬទីសំណាក់បច្ចុប្បន្ន ឬការធ្វើដំណើរចេញ ចូល « តំបន់ក្រហម» អាចត្រូវបានអនុញ្ញាត ក្នុងករណីចាំបាច់។
ចំណែកឯ ភូមិភូមិចក ភូមិកម្កោតស្បូវ ភូមិព្រៃបឹង នៃឃុំបែកចាន ត្រូវបានកំណត់ជា«តំបន់លឿងទុំ» ។ ដូច្នេះក្នុងអំឡុងពេលបិទខ្ទប់ នៅក្នុងភូមិទាំង៣នេះ រដ្ឋបាលខេត្តកណ្ដាល បានកំណត់ការធ្វើដំណើររបស់មន្ត្រី និងបុគ្គលិកផ្នែកប្រតិបត្តិការនៅអាកាសយានដ្ឋាន ត្រូវភ្ជាប់ជាមួយឯកសារអត្តសញ្ញាណ និងលិខិតបញ្ជាបេសកម្ម និងលិខិតអនុញ្ញាតធ្វើដំណើររបស់ស្ថាប័ន ឬអង្គភាពសាមី។
ចំពោះការធ្វើដំណើរ ដែលបានរៀបរាប់ខាងលើនេះ ត្រូវបានអនុញ្ញាតនៅក្នុង «តំបន់លឿងទុំ» និងឆ្លងកាត់ចូល«តំបន់លឿង» ប៉ុន្ដែការធ្វើដំណើរចេញពី «តំបន់លឿងទុំ» ឆ្លងកាត់ «តំបន់ក្រហម» ឬក្រៅភូមិសាស្រ្តដែលត្រូវបានបិទខ្ទប់ ត្រូវបានអនុញ្ញាត តែក្នុងករណីដែលមានចែងក្នុងចំណុចទី១ នៃប្រការ៣ និងប្រការ៦នៃសេចក្តីសម្រេចតែប៉ុណ្ណោះ។ នេះបើតាមប្រការ៤ នៃសេចក្តីជូនដំណឹងនេះ។
រីឯភូមិព្រៃពពេល នៃឃុំពើក ជាភូមិស្ថិតក្នុង«តំបន់លឿង» ពលរដ្ឋរស់នៅភូមិនេះ អាចធ្វើដំណើរ និងប្រកបរបរបានធម្មតា។ ប៉ុន្ដែការធ្វើដំណើរចេញពី « តំបន់លឿង» ឆ្លងកាត់ «តំបន់ក្រហម» និង «តំបន់លឿងទុំ» ដែលត្រូវបានបិទខ្ទប់ ត្រូវបានអនុញ្ញាតក្នុងករណីដែលមានចែងក្នុងចំណុចទី១ នៃប្រការ៣ និងប្រការ៦ នៃសេចក្តីសម្រេច។
បើយោងតាមសេចក្តីជូនដំណឹងរដ្ឋបាលខេត្តកណ្ដាល នៅត្រង់ប្រការ៨ បានបញ្ជាក់ថា ចំពោះបុគ្គល ឬ នីតិបុគ្គលទាំងឡាយណា ដែលបំពានវិធានការហាមឃាត់ការធ្វើដំណើរ វិធានការហាមឃាត់សកម្មភាពការងារ មុខរបរ ឬអាជីវកម្ម និងវិធានការជួបជុំ ឬការប្រមូលផ្តុំមនុស្ស ក្នុងភូមិសាស្រ្ត «តំបន់ក្រហម» « តំបន់លឿងទុំ» និង «តំបន់លឿង» នឹងត្រូវអនុវត្តវិធានការច្បាប់យ៉ាងម៉ឺងម៉ាត់ ដោយរួមទាំងការឃាត់ទុកជាបណ្ដោះអាសន្ន នូវមធ្យោបាយធ្វើដំណើរ និងទណ្ឌកម្មរដ្ឋបាល ដោយអនុលោមតាមបទប្បញ្ញត្តិ និងនីតិវិធីជាធរមាន៕
Tag:
កូវីដ-១៩
កណ្ដល
តំបន់
ក្រហម
លឿងទុំ
លឿង
© រក្សាសិទ្ធិដោយ thmeythmey.com