កីឡាករបរទេស ៥រូបដែលគ្រូបង្វឹកក្រុមជម្រើសជាតិចិនលោក Li Tie បានជ្រើសរើសរួមមានការពារឆ្នើមជនជាតិអង់គ្លេស Tyias Browning និងខ្សែបម្រើ Nico Yennaris រួមទាំងកីឡាករប្រេស៊ីល៣រូបទៀតដូចជាខ្សែប្រយុទ្ធ Elkeson, Alan Carvalho និង Fernandinho។
 

Browning, Elkeson, Carvalho និង Fernandinho ស្ថិតក្នុងចំណោមកីឡាករទាំង ៧ របស់ក្លិប Guangzhou FC នៃលីគកីឡាបាល់ទាត់កំពូលចិន ដែលលោក Tie កោះហៅឱ្យចូលក្រុមច្រើនជាងគេក្នុងយុទ្ធនាការជម្រុះពានពិភពលោកនៅចុងខែឧសភា ដើម្បីឆ្ពោះទៅកាតានៅឆ្នាំ២០២២ ។
 

ក្នុងចំណោមកីឡាករទាំង២៦រូប ដែលអតីតសមាជិកក្រុម Everton ហៅទៅជំរុំហ្វឹកហាត់ ដែលចាប់ផ្តើមពីថ្ងៃទី១៤ ខែឧសភា មានកីឡាករដែលប្រកបអាជីពតែមួយរូបប៉ុណ្ណោះ គឺ Wu Lei របស់ក្រុម Espanyol នៃលីគអេស្ប៉ាញ។
 

ចិនបច្ចុប្បន្នស្ថិតនៅក្នុងចំណាត់ថ្នាក់លេខ២ ពូល A ដោយតាមពីក្រោយក្រុមកំពូលតារាងស៊ីរីដល់ទៅ៨ពិន្ទុ។ ចិនរកបាន៧ពិន្ទុពីការប្រកួត៤លើក ឯស៊ីរីមាន១៥ពិន្ទុពីការប្រកួត៥លើក។ ហ្វីលីពីនឈរលេខ៣មាន៧ពិន្ទុ ម៉ាល់ឌីវ មាន៦ពិន្ទុនៅលេខ៤ ឯកោះហ្គាំមនៅបាតតារាងគ្មានពិន្ទុរាប់។
 

ការប្រកួតដែលនៅសល់ក្នុងពូល A គ្រោងនឹងធ្វើឡើងនៅប្រទេសចិនចាប់ពីថ្ងៃទី៣០ ខែឧសភារហូតដល់ថ្ងៃទី១៥ ខែមិថុនា។ ក្នុងការប្រកួតជម្រុះជុំទី២ ទ្វីបអាស៊ីទាំង៨ពូល ក្រុមដែលទទួលបានចំណាត់ថ្នាក់ទី១ក្នុងពូលនីមួយៗ ទើបទទួលបានកៅអីទៅវគ្គជម្រុះជុំទី៣បន្តទៀត៕