លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា FFC បាននិយាយថា សហព័ន្ធកំពុងរៀបចំឯកសារកីឡាករ សម្រាប់ធ្វើដំណើរទៅប្រទេសបារ៉ែនហើយ។ បើតាមលោក សារ៉េត ក្រុមជម្រើសជាតិកម្ពុជា ត្រូវធ្វើតេស្ត និងតាមដានសុខភាព រយៈពេល៧២ម៉ោងទៀត ពេលទៅដល់ប្រទេសបារ៉ែន រីឯក្រុមដទៃទៀត ក៏ត្រូវគោរពវិធានការបែបនេះដែរ។
 

ចំពោះការហ្វឹកហាត់វិញ អគ្គលេខាធិការសហព័ន្ធកីឡាបាល់ទាត់កម្ពុជារូបនេះ បានបញ្ជាក់ថា ក្រុមជម្រើសជាតិ មិនមានការជួបជុំហ្វឹកហាត់នៅឡើយទេ ប៉ុន្តែតម្រូវឱ្យកីឡាករម្នាក់ៗ ពង្រឹងការហ្វឹកហាត់នៅតាមផ្ទះរៀងៗខ្លួន។ ដ្បិតមិនបានហ្វឹកហាត់ជុំគ្នាក្តី ប៉ុន្តែក្រុមជម្រើសជាតិកម្ពុជា អាចមានពេល១សប្ដាហ៍ មុនការប្រកួតនៅថ្ងៃទី៣ មិថុនា ដើម្បីប្រមូលផ្ដុំគ្នាហ្វឹកហាត់នៅប្រទេសបារ៉ែនតែម្ដង។
 

« (ក្រុមជម្រើសកម្ពុជា) ប្រហែលជាត្រូវទៅហាត់នៅបារ៉ែនតែម្ដង ពីព្រោះយើងគ្មានពេលសម្រាប់ហ្វឹកហាត់នៅក្នុងស្រុកទេ ដោយវិបត្តិកូវីដ-១៩។សម្រាប់បេក្ខជនក្រុមជម្រើសជាតិយើងមិនមានបញ្ហាអ្វីនោះទេ មានកម្លាំងសមល្មមសម្រាប់ការប្រកួតនៅប្រទេសបារ៉ែន»។ នេះបើតាមលោក កែវ សារ៉េត។
 

សូមបញ្ជាក់ថា កម្ពុជាស្ថិតនៅក្នុងពូល C ជាមួយអ៊ីរ៉ង់ .អ៊ីរ៉ាក់. ហុងកុង និងប៉ារ៉ែន ហើយក្រុមនីមួយៗភាគច្រើននៅសល់ ៣ប្រកួតក្នុងដៃ ដោយលើកលែងតែអ៊ីរ៉ង់ ដែលសល់ ៤ប្រកួតទៀត ។ នៅក្នុងពូលនេះ កម្ពុជា កំពុងស្ថិតនៅបាតតារាង ដោយមានតែ១ពិន្ទុប៉ុណ្ណោះ បន្ទាប់ពីឆ្លងកាត់ ៥ប្រកួត ស្មើ១ និងចាញ់៤ ៕