COVID-19
ជាតិ
កូវីដ-១៩៖ ខណ្ឌសែនសុខ ពោធិ៍សែនជ័យ ឫស្សីកែវ និងមានជ័យ នៅតែមានអត្រាឆ្លងខ្ពស់ប្រចាំថ្ងៃ
×![]()
ដោយ: ខន ចំប៉ា
ភ្នំពេញ៖ មនុស្ស ១៤៣នាក់បន្ថែមទៀត មានតេស្តវិជ្ជមាន នៅរាជធានីភ្នំពេញ ក្នុងនោះខណ្ឌសែនសុខ ពោធិ៍សែនជ័យ ឫស្សីកែវ និងខណ្ឌមានជ័យ នៅតែមានអត្រាឆ្លងកូវីដ-១៩ខ្ពស់ប្រចាំថ្ងៃ។ នេះបើតាមរបាយការណ៍អ្នកឆ្លងកូវីដ-១៩ ប្រចាំថ្ងៃទី១៧ ឧសភា របស់រដ្ឋបាលរាជធានីភ្នំពេញ។ តាមរបាយការណ៍ដដែល ក្នុងចំណោមអ្នកឆ្លងថ្មីទាំងនោះមានទារក និងកុមារ ៩នាក់។ 
តាមរបាយការណ៍អ្នកឆ្លងកូវីដ-១៩ប្រចាំថ្ងៃទី១៧ ឧសភា របស់រដ្ឋបាលរាជធានីភ្នំពេញ មានមនុស្សចំនួន១៤៣នាក់ទៀត មានតេស្តវិជ្ជមានកូវីដ-១៩ នៅរាជធានីភ្នំពេញ ក្នុងនោះខណ្ឌសែនសុខមានច្រើនជាងគេ គឺដល់ទៅ៣០នាក់ ខណៈខណ្ឌពោធិ៍សែនមាន២៦នាក់ ខណ្ឌឫស្សីកែវ ២៣នាក់ ខណៈខណ្ឌមានជ័យមាន២២នាក់។ ក្នុងចំណោមអ្នកឆ្លងថ្មីទាំង១៣០នាក់នេះ មានទារក និងកុមារអាយុក្រោម ១៥ឆ្នាំ សរុប ៩នាក់។
ក្រៅពីខណ្ឌទាំង៤ខាងលើ ដែលនៅតែមានអត្រាឆ្លងខ្ពស់ប្រចាំថ្ងៃ ខណ្ឌ៩ផ្សេងទៀតនៅភ្នំពេញ ក៏មានពលរដ្ឋវិជ្ជមានដែរ ដែលខណ្ឌដង្កោមាន១២នាក់ , ខណ្ឌកំបូលមាន៥នាក់ ,ខណ្ឌទួលគោក និង៧មករា មាន៤នាក់រៀងខ្លួន ខណៈខណ្ឌចំការមន ច្បារអំពៅ និងខណ្ឌបឹងកេងកង មាន៣ករណីរៀងខ្លួនដែរ។ ខណ្ឌដូនពេញ និងព្រែកព្នៅ ក៏មាន២ករណីដូចគ្នាដែរ។ ពលរដ្ឋរស់នៅស្រុកមុខកំពូល ២នាក់ និងនៅស្រុកអង្គស្នួល ២នាក់ ក៏ត្រូវបានរកឃើញថាមានវិជ្ជមានកូវីដ-១៩ នៅរាជធានីភ្នំពេញដែរ។
គិតមកដល់ពេលនេះ កម្ពុជាមានអ្នកកើតកូវីដ-១៩ ចំនួន ២២ ៥៤៤នាក់ ដោយសះស្បើយមាន ១៣ ០០៦នាក់ និងស្លាប់កើនដល់ ១៥៤នាក់៕
© រក្សាសិទ្ធិដោយ thmeythmey.com
