បើទោះ Man Utd ប្រកាសដកខ្លួនចេញពីគម្រោងបង្កើតពាន European Super League ប៉ុន្តែការតវ៉ាប្រឆាំងនឹងក្រុមគ្រួសារ Glazer នៅ Old Trafford ពីសំណាក់អ្នកគាំទ្របានកើតឡើងយ៉ាងខ្លាំងក្លា។ ការតវ៉ារបស់អ្នកគាំទ្រ ក៏បានធ្វើឱ្យបិសាចក្រហមត្រូវខកខាន រហូតត្រូវពន្យាការប្រកួតជាមួយ Liverpool ទៀតផង។
 

ការតវ៉ាម្តងជាពីរដងពីសំណាក់អ្នកគាំទ្រនេះ ដោយសារពួកគេចង់ឱ្យគ្រួសារ Glazer ចាកចេញពីតំណែងម្ចាស់ភាគហ៊ុនរបស់ក្លិបបិសាចក្រហម ដោយរិះគន់ និងបង្ហាញការមិនពេញចិត្តអំពីរបៀបដឹកនាំរបស់ក្រុមគ្រួសារមហាសេដ្ឋីអាមេរិក ដែលតែងតែចាយវាយប្រាក់ដែលរកបានពីក្លិប ខុសគោលដៅ។
 

យ៉ាងណា ក្រោយជំនួបសារជាថ្មីរវាង Man Utd និង Livperpool ដែមមានការតវ៉ាដដែលនោះលោក Joel Glazer សន្យាថានឹងជួបជាមួយអ្នកគាំទ្រម្តង នៅក្រោយបញ្ចប់រដូវកាល។ ទីបំផុតលោក Glazer ពិតជាអនុវត្តន៍តាមការសន្យា។
 

«ខ្ញុំទន្ទឹងរង់ចាំជួបជាមួយអ្នកគាំទ្រ ក្នុងវេទិកាអ្នកគាំទ្រដើម្បីស្តាប់ទស្សនៈរបស់ពួកគេ និងដើម្បីជាផ្នែកមួយនៃការពិភាក្សាប្រកបដោយការស្ថាបនា។ លោក Glazer បានប្រាប់វេបសាយរបស់ Man Utd ដូច្នេះ។
 

សមាជិកគ្រួសារមហាសេដ្ឋីអាមេរិករូបនេះបន្ថែមថា លោកជឿជាក់ថាកិច្ចប្រជុំនេះនឹងកើតជាផ្លែផ្កា និងកិច្ចសហប្រតិបត្តិការជាវិជ្ជមានរវាងក្លិប និងអ្នកគាំទ្រចាប់ពីរដូវកាលក្រោយទៅ៕