COVID-19
ជាតិ
សង្គមជាតិ
តាកែវ សៀមរាប និងកំពង់ចាមបន្តរកឃើញអ្នកឆ្លងជំងឺកូវីដ-១៩ ចំនួន៦៣ករណី រូបភាពពីរដ្ឋបាលខេត្តសៀមរាប
×
ភ្នំពេញ៖ រដ្ឋបាលខេត្តតាកែវ,ខេត្តសៀមរាប និងកំពង់ចាម នាថ្ងៃទី៣០ ខែឧសភា បានបន្តឃើញអ្នកឆ្លងជំងឺកូវីដ-១៩ថ្មីសរុបចំនួន៦៣ករណីទៀត។ ក្នុងនោះខេត្តតាកែវមាន៣៣ករណី ខេត្តសៀមរាបមាន៨ករណី និងកំពង់ចាម២២ករណី។ ជាមួយគ្នានេះខេត្តសៀមរាបក៏មានអ្នកជាសះស្បើយ២ករណី ហើយខេត្តកំពង់ចាម៦៤ករណី។
រដ្ឋបាលខេត្តតាកែវបានបញ្ជាក់ថា ក្នុងចំណោមអ្នកឆ្លងជំងឺកូវីដ-១៩ទាំង៣៣ករណីនេះ គឺ១៤នាក់នៅស្រុកត្រំាកក់,៨នាក់នៅស្រុកព្រៃកប្បាស,៤នាក់នៅក្រុងដូនកែវ,៤នាក់នៅស្រុកសំរោង និង២នាក់នៅស្រុកបាទី និងស្រុកទ្រាំង។
ក្នុងចំណោមអ្នកជំងឺទាំងនោះ គឺភាគច្រើនជាកម្មកររោងចក្រ, អភិបាលរងខេត្តតាកែវ,មន្ត្រីសាលាខេត្តតាកែវ,អាជីវករ,នគរបាលជាតិ,កសិករ,មេធាវី និងអ្នកមកពីរាជធានីភ្នំពេញ។
ចំពោះអ្នកជំងឺទាំង៨នាក់ដែលរកឃើញនៅខេត្តសៀមរាប គឺ៦នាក់មកពីប្រទេសថៃ,១នាក់ជាអ្នកបើកបររថយន្តឈ្នួលពីភ្នំពេញទៅប៉ោយប៉ែត និងម្នាក់ទៀតជាអ្នកធ្វើដំណើរមកពីប៉ោយប៉ែត ខេត្តបន្ទាយមានជ័យ។ សម្រាប់អ្នកជាសះស្បើយនៅខេត្តសៀមរាបចំនួន២នាក់ គឺត្រូវបានពេទ្យអនុញ្ញាតឲ្យត្រឡប់ទៅគេហដ្ឋានវិញហើយ។
ដោយឡែកខេត្តកំពង់ចាមក៏បន្តរកឃើញអ្នកវិជ្ជមានកូវីដ-១៩ចំនួន២២នាក់ដែលឆ្លងជាសហគមន៍ និងជាសះស្បើយចំនួន៦៤នាក់។ ក្នុងចំណោមអ្នកជំងឺទាំង២២នាក់នោះ គឺ៦នាក់នៅស្រុកជើងព្រៃ,៧នាក់នៅស្រុកបាឆាយ,២នាក់នៅស្រុកកំពង់សៀម,៣នាក់នៅស្រុកស្រីសន្ធរ,៣នាក់នៅស្រុកព្រៃឈរ និងមកពីខេត្តត្បូងឃ្មុំ១នាក់។ ពួកគេទាំងនោះគឺភាគច្រើនឆ្លងពីកម្មការិនីរោងចក្រដែលវិជ្ជមានកូវីដ-១៩។
មកដល់ពេលនេះ កម្ពុជា មានអ្នកជំងឺកូវីដ-១៩ សរុប២៩,៤០៤នាក់ ជាសះស្បើយ២២,១៨៨នាក់ និងស្លាប់២០៩នាក់៕
© រក្សាសិទ្ធិដោយ thmeythmey.com