កាលពីថ្ងៃទី២៩ ខែឧសភា រដ្ឋបាលខេត្ត បានរកឃើញមនុស្ស ៨នាក់មានវិជ្ជមានកូវីដ-១៩។ ក្នុងចំណោមមនុស្សទាំង៨នាក់ មានម្នាក់ឈ្មោះ ចាន់ តារ៉ា ភេទប្រុស អាយុ២៤ឆ្នាំ ជាអ្នកស្រុកព្រៃកប្បាស ខេត្តតាកែវ ដែលបានធ្វើដំណើរមកពីក្រុងប៉ោយប៉ែត ខេត្តបន្ទាយមានជ័យ។ ពេលមកដល់ទីរួមស្រុកក្រឡាញ់ បុគ្គលវិជ្ជមានរូបនេះ បានចូលផ្សារ និងមានទំនាក់ទំនងជាមួយអាជីវករមួយចំនួនក្នុងផ្សារក្រឡាញ់ ស្ថិតនៅភូមិកំពង់ថ្កូវ២ ឃុំកំពង់ថ្កូវ ស្រុកក្រឡាញ់ ខេត្តសៀមរាប។

 

ហេតុនេះហើយទើបរដ្ឋបាលស្រុកក្រឡាញ់ សម្រេចបិទខ្ទប់បណ្ដោះអាសន្នផ្សារក្រឡាញ់ ដែលស្ថិតនៅភូមិកំពង់ថ្កូវ២ ឃុំកំពង់ថ្កូវ ស្រុកក្រឡាញ់ ខេត្តសៀមរាប ដើម្បីទប់ស្កាត់ការឆ្លងរាតត្បាតនៃជំងឺកូវីដ-១៩។

 

បើតាមរបាយការណ៍របស់ក្រសួងសុខាភិបាល គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុបចំនួន ៣០ ០៩៤នាក់ អ្នកជាសះស្បើយសរុបចំនួន ២២ ៦៣៦នាក់ ខណៈអ្នកស្លាប់កើនដល់ ២១៤នាក់៕