COVID-19
ជាតិ
កូរ៉េ បន្តផ្តល់ជំនួយជាបរិក្ខារពេទ្យតម្លៃ៣០ម៉ឺនដុល្លារដល់កម្ពុជា ដើម្បីទប់ស្កាត់កូវីដ-១៩ លោក ផាក ហ៊ឺងខ្យង់ (Park Heung-kyeong)ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា(ស្តាំ) និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល។
× ភ្នំពេញ៖ កម្ពុជា ទទួលបានជំនួយជាបរិក្ខារវេជ្ជសាស្ត្រ ដែលមានតម្លៃសរុប៣០ម៉ឺនដុល្លារទៀត ពីសាធារណរដ្ឋកូរ៉េ ដើម្បីទប់ស្កាត់ការរាតត្បាតដោយជំងឺកូវីដ-១៩។ ពិធីប្រគល់-ទទួលជំនួយឥតសំណងនេះ បានធ្វើឡើងក្រោមវត្តមានលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ផាក ហ៊ឺងខ្យង់ (Park Heung-kyeong) ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា នាថ្ងៃទី១មិថុនា។
បរិក្ខារវេជ្ជសាស្ត្រតម្លៃ៣០ម៉ឺនដុល្លារដែលកម្ពុជាទទួលបានពីរដ្ឋាភិបាលប្រទេសកូរ៉េនេះ គឺជាឧបករណ៍ធ្វើតេស្តរកមេរោគកូវីដ-១៩។ បើតាមប្រសាសន៍របស់លោក ម៉ម ប៊ុនហេង ចំណងមិត្តភាពរវាងកម្ពុជា-កូរ៉េ កាន់តែរឹងមាំ តាមរយៈការផ្តល់ជំនួយឥតសំណងជាច្រើនពីរដ្ឋាភិបាលប្រទេសកូរ៉េ ក្នុងការរួមចំណែកធ្វើឱ្យប្រសើរឡើងនូវវិស័យសុខាភិបាលកម្ពុជា។ លោកបានបញ្ជាក់ដូច្នេះ៖«ជំនួយមនុស្សធម៌របស់ភាគីមិត្តកូរ៉េនាថ្ងៃនេះ នឹងរួមចំណែកទប់ស្កាត់ការរីករាលដាលនៃជំងឺកូវីដ-១៩ នៅកម្ពុជា»។
សាធារណកូរ៉េបានផ្តល់ជំនួយជាសម្ភារបរិក្ខារវេជ្ជសាស្ត្រ និងថវិកាដល់កម្ពុជា ជាបន្តបន្ទាប់ ចាប់តាំងពីការរីករាលដាលនៃជំងឺកូវីដ-១៩ក្នុងពិភពលោក ដើមឆ្នាំ២០២០មកម្លេះ។ តាមរយៈកម្មវិធីជំនួយឆ្លើយតបនឹងកូវីដ-១៩ កូរ៉េធ្លាប់ផ្តល់ជំនួយឱ្យកម្ពុជាក្នុងចំនួនទឹកប្រាក់ជិត១លានដុល្លារ។ ក្នុងនោះមាន តង់សម្រាប់ធ្វើតេស្តរកមេរោគកូវីដ-១៩ ចំនួន២០ និងបន្ទប់ចល័តសម្រាប់ដាក់អ្នកជំងឺកូវីដ-១៩ (Negative Pressure Carriers) ចំនួន៦០។
ក្រៅពីនេះ រដ្ឋាភិបាលសាធារណរដ្ឋកូរ៉េ ក៏មានកិច្ចសហប្រតិបត្តិការជាមួយអង្គការអន្តោប្រវេសន៍អន្តរជាតិលើការពង្រឹងការឆ្លើយតបនឹងជំងឺកូវីដ-១៩ ដើម្បីបញ្ជូនជនអន្តោប្រវេសន៍នៅកម្ពុជានៅចំណុចច្រក-ចូល និងមណ្ឌលចត្តាឡីស័កផ្តោតលើខេត្តចំនួន ៥ គឺខេត្តបាត់ដំបង ខេត្តបន្ទាយមានជ័យ ខេត្តឧត្តរមានជ័យ ខេត្តសៀមរាប និងខេត្តព្រៃវែង៕
© រក្សាសិទ្ធិដោយ thmeythmey.com