COVID-19
សង្គមអន្តរជាតិ
អន្តរជាតិ
នយោបាយអន្តរជាតិ
វ៉ាក់សាំង Sinovac ទទួលបានការអនុញ្ញាតឲ្យប្រើប្រាស់បន្ទាន់ជាផ្លូវការពី WHO
× ទីបំផុតទៅអង្គការសុខភាពពិភពលោក (WHO) បានសម្រេចដាក់វ៉ាក់សាំងចិន Sinovac របស់ចិនជាប្រភេទវ៉ាក់សាំងប្រើប្រាស់បន្ទាន់ជាផ្លូវការ នៅថ្ងៃអង្គារទី ១ខែមិថុនា។ នេះបើតាមការប្រកាសរបស់អគ្គនាយកអង្គការសុខភាពពិភពលោក លោក Tedros Adhanom Ghebreyesus។
«ថ្ងៃនេះខ្ញុំរីករាយនឹងប្រកាសថាវ៉ាក់សាំង Coronavac របស់ក្រុមហ៊ុន Sinovac ទទួលបានការអនុញ្ញាតឲ្យប្រើប្រាស់បន្ទាន់ជាផ្លូវការពីអង្គការ WHO បន្ទាប់ពីរកឃើញថាវ៉ាក់សាំងនេះមានប្រសិទ្ធភាព សុវត្ថិភាព និងគុណភាព បន្ទាប់ពីចាក់ហើយចំនួនពីរដូស»។ លោក Tedros ថ្លែងបែបនេះតាមក្នុងសន្និសីទព័ត៌មាននាថ្ងៃអង្គារនេះ។
បន្ទាប់ពីទទួលបានការអនុញ្ញាតឲ្យប្រើប្រាស់បន្ទាន់នេះ Sinovac នឹងស្ថិតក្នុងចំណោមវ៉ាក់សាំងប្រាំមួយប្រភេទផ្សេងទៀតដែលគេអាចបញ្ជាទិញ និងចែកចាយបានតាមរយៈយន្តការ COVAX។ វាជាប្រភេទវ៉ាក់សាំងរបស់ចិនទីពីរហើយដែលត្រូវបានការទទួលស្គាល់ប្រសិទ្ធភាពនិងសុវត្ថិភាពដោយស្ថាប័នអន្តរជាតិនេះ។
ថ្វីបើទើបទទួលបានការអនុញ្ញាតពី WHO ក៏ដោយចុះ វ៉ាក់សាំងរបស់ចិន Sinovac ចំនួនជាង ២៦០លានដូសរួចទៅហើយដែលត្រូវបានចែកចាយ និងប្រើប្រាស់នៅក្នុងប្រទេសនិងតំបន់ចំនួន ៤៦ ទូទាំងពិភពលោកក្នុងនោះមានទាំងកម្ពុជាផងដែរ។ នេះបើតាមសារព័ត៌មានរដ្ឋចិន Global Times។
សូមបញ្ជាក់ថា បន្ថែមពីលើវ៉ាក់សាំងក្រុមហ៊ុន Sinovac វ៉ាក់សាំងចំនួនប្រាំមួយដែល WHO បានសម្រេចអនុញ្ញាតប្រើប្រាស់បន្ទាន់នោះមានដូចជា វ៉ាក់សាំងរបស់ក្រុមហ៊ុន Moderna, វ៉ាក់សាំងក្រុមហ៊ុន Pfizer, វ៉ាក់សាំង AstraZeneca ផលិតនៅកូរ៉េខាងត្បូង និងផលិតដោយវិទ្យាស្ថានSerum របស់ឥណ្ឌា វ៉ាក់សាំងក្រុមហ៊ុន Janssen និងវ៉ាក់សាំង Sinopharm របស់វិទ្យាស្ថានប៉េកាំង៕
© រក្សាសិទ្ធិដោយ thmeythmey.com