ភ្នំពេញ៖ លោក ថោង សូលីម៉ូ អ្នកនាំពាក្យក្រសួងការពារជាតិ អះអាងថា យោធាដែលប្រើកាំភ្លើងបាញ់ពលរដ្ឋក្នុងជម្លោះដីធ្លីក្នុងស្រុកអង្គស្នួល ខេត្តកណ្ដាល នឹងទទូលរងពិន័យតាមច្បាប់។ តំណាងពលរដ្ឋនៅតំបន់ជម្លោះនោះថា ពួកគេរង់ចាំដំណោះស្រាយជាយូរមកហើយ ចាប់តាំងពីរដ្ឋាភិបាលសម្រេចយកដីរបស់ពួកគេ ប៉ុន្តែពុំឃើញមានដំណោះស្រាយឡើយ។
ជាពលរដ្ឋនៅភូមិអង្គស្រែពោធិ៍ ឃុំទួលពេជ្រ ស្រុកអង្គស្នួល ខេត្តកណ្ដាល លោកផាត់ សុវណ្ណ បានប្រាប់សារព័ត៌មានថ្មីៗ នៅថ្ងៃទី៤មិថុនាថា ដំបូងឡើយ កម្លាំងយោធាបានបាញ់គ្រាប់កាំភ្លើងទៅលើ ហើយបាញ់ខ្ទប់ដី ប៉ុន្តែនៅពេលពលរដ្ឋតវ៉ាកាន់តែខ្លាំង ហើយនាំគ្នារត់និងកាន់ដំបងដើម្បីការពារខ្លួន ស្រាប់តែមានការបាញ់រះ បណ្ដាលឲ្យពលរដ្ឋម្នាក់រងរបួសតែម្ដង។
តែយ៉ាងណាលោក ថោង សូលីម៉ូ អះអាងថា ក្នុងពេលប៉ះទង្គិចគ្នាជាមួយពលរដ្ឋនោះ កងកម្លាំងយោធា បានបាញ់ខ្ទប់ដី និងឡើងលើ ដើម្បីគំរាមប៉ុណ្ណោះ ប៉ុន្តែជាអកុសលគ្រាប់កាំភ្លើងនោះ បានផ្លាតទៅចំត្រូវពលរដ្ឋ។ «កម្លាំងពលរដ្ឋមានដំបង ដបសាំង កាំបិត ពូថៅអ៊ីចឹង ហើយក៏បានគប់ដបសាំងទៅបំផ្លាញគ្រឿងចក្រ។ ហើយខាងកងទ័ពក៏បានឡើងលើនិងខ្ទប់ដី ប៉ុន្តែជារឿងអកុសល សោកស្ដាយ(បាញ់តត្រូវពលរដ្ឋ)។ ព្រោះការបាញ់នេះ គឺបាញ់សម្ងែងពលរដ្ឋកុំឲ្យចូលទៅបំផ្លាញគ្រឿងចក្រ និងការពារខ្លួនទេ មិនមែនបញ្ជាថ្នាក់លើណាឲ្យបាញ់ឡើយ...ខាងកងទ័ពយើញ នឹងមានចំណាត់ការនិងពិន័យតាមកងទ័ព(លើអ្នកប្រើអាវុធបាញ់លើពលរដ្ឋ)»។ នេះបើតាមការលើកឡើងរបស់លោក សូលីម៉ូ ដោយបន្ថែមថា ការដាក់ពិន័យកម្រិតណា ខាងលោកមិនទាន់ដឹងនោះទេ គឺរង់ចាំការស្រាវជ្រាវបន្ថែមទៀតលើករណីនេះ។
លោក ស៊ឹង សែនករុណា អ្នកនាំពាក្យសមាគមសិទ្ធិមនុស្សអាដហុក (ADHOC) យល់ថា កម្លាំងយោធាមិនគួរប្រើហិង្សាលើពលរដ្ឋ រហូតមានរបួសស្នាមបែបនេះឡើយ។ លោកថា អាជ្ញាធរ ត្រូវតែរកជនដៃដល់ដែលបាញ់ពលរដ្ឋជម្លោះដីធ្លីនេះ មកដោះស្រាយតាមច្បាប់ ។
«ករណីនេះ យើងខ្លាចកើតមានជាបន្តបន្ទាប់ ប្រសិនអាជ្ញាធរដោះស្រាយមិនបានល្អឬមិនស្របតាមច្បាប់។ ព្រោះប្រទេសយើងមានច្បាប់ ហើយការនិយាយថា ការពារគ្រឿងចក្រទើបបាញ់សម្ញែងនិងបាញ់លើពលរដ្ឋនោះ មិនសមស្របនោះទេ។ ព្រោះដីស្ថិតក្នុងជម្លោះនៅឡើយ ដូច្នេះ ពលរដ្ឋក៏មានមូលហេតុក្នុងការពារដីរបស់ខ្លួនដែរ។ វិវាទដីដោះស្រាយមិនទាន់ចប់ មិនអាចកំណត់ដីថាជារបស់អ្នកណាបាននោះទេ»។ នេះជាការលើកឡើងរបស់លោក ស៊ឹង សែនករុណា ដោយសង្កត់ធ្ងន់ថា ក្រសួងរៀបចំដែនដី នគរូបនីយកម្ម និងសំណង់ ឬគណៈកម្មការដោះស្រាយវិវាទដីធ្លី គួរតែចុះស្រាវជ្រាវ ដើម្បីដោះស្រាយទំនាស់នេះ។
ជុំវិញករណីនេះលោក ផាត់ សុវណ្ណ អះអាងថា ពួកគេទាមទារឲ្យរដ្ឋាភិបាល និងអាជ្ញាធរគួរតែមានដំណោះស្រាយសមរម្យសម្រាប់ពួកគេ។ ពលរដ្ឋរូបនេះ បានអះអាងថា៖ «ចាប់តាំងពីរដ្ឋាភិបាលសម្រេចកាត់ដីតំបន់ចម្ការបារាំងនេះយក ពលរដ្ឋដែលរងគ្រោះមិនទាន់ទទួលបានសំណងនិងដំណោះស្រាយទេ។ គ្មានដំណោះស្រាយផង ហេតុចង់បានដីពួកខ្ញុំ»។
អ្នកនាំពាក្យរូបនេះ ក៏ទទួលស្គាលដែរថា ដីធ្លីនៅតំបន់ចម្ការបារាំងប្រមាណ២៨០ហិកតា គឺជាប់ពាក់ព័ន្ធនឹងដីពលរដ្ឋដែលធ្លាប់អាស្រ័យផលលើដីនោះ ជាច្រើនឆ្នាំហើយផង។ ប៉ុន្តែបញ្ហានេះ លោក ថោង សូលីម៉ូ ពន្យល់ថា កងកម្លាំង មិនបានទៅបំពានដីពលរដ្ឋឡើយ ព្រោះដីនោះ ជាដីដែលរដ្ឋាភិបាលប្រគល់ឲ្យខាងយោធា។ ចំណែកការយកគ្រឿងចក្រទៅកាយព្រំដីនេះ គឺមានការបញ្ជាពីថ្នាក់លើ ហើយក៏បានជូនដំណឹងទៅអាជ្ញាធរខេត្តផងដែរ។
លោកអះអាងថា៖ «យើងយកគ្រឿងចក្រទៅកាយដី ដើម្បីដឹងពីព្រំប្រទល់ដីត្រឹមចំណុចណារបស់កងកម្លាំងយើងគ្រប់គ្រង។ កន្លងមក យើងក៏បានចុះទាក់ទងទៅអាជ្ញាធរភូមិឃុំដែរ ប៉ុន្តែពួកគាត់មិនសូវខ្វល់និងសហកាជាមួយ ហើយពលរដ្ឋក៏មិនសូវយល់ទៀត។ អ៊ីចឹងបានយើងយកគ្រឿងចក្រចុះទៅកាយ បើយើងមិនទៅកាយព្រំ យើងក៏មិនដឹងថាពលរដ្ឋណាខ្លះពាក់ពន្ធដែរ»។
កាលពីថ្ងៃ៣ មិថុនា រដ្ឋបាលខេត្តកណ្ដាល បានចេញលិខិតមួយថា ដីធ្លីទាំងនេះជាកម្មសិទ្ធិរបស់រដ្ឋ ទោះបីជាប្រជាពលរដ្ឋមួយចំនួន បានអះអាងថា ពួកគាត់បានធ្វើការដាំដុះលើដីនោះ តាំងពីឆ្នាំ១៩៧៩មកម្ល៉េះក៏ដោយ។
សេចក្ដីជូនដំណឹងនេះ បញ្ជាក់យ៉ាងដូច្នេះថា៖ «ដីចម្ការបារាំងជាដីរដ្ឋ ដែលរាជរដ្ឋាភិបាលគ្រោងរៀបចំ មួយផ្នែកសម្រាប់ប្រើប្រាស់ជាប្រយោជន៍វិស័យការពារជាតិ និងមួយផ្នែកទៀត ប្រើប្រាស់សម្រាប់វិស័យបរិស្ថាន ជាទីតាំងសម្រាប់ទុកដាក់សំរាម និងសំណង់រឹងចុងក្រោយកម្រិតតំបន់»។
វិវាទដីធ្លីនេះពាក់ព័ន្ធនឹងទំហំដីជាង១៥០ ហិកតា ដែលប្រជាពលរដ្ឋជាង ៣០០គ្រួសារ ក្នុងភូមិយ៉ាងតិច ៧ បានធ្វើការដាំដុះជាច្រើនឆ្នាំមកហើយ។ នេះបើតាមអង្គការលីកាដូ៕