អភិបាលខណ្ឌដូនពេញ បានសង្កេតឃើញថា ក្រោយបញ្ចប់បិទខ្ចប់រាជធានីភ្នំពេញ មានអ្នកលក់រថយន្តមួយចំនួនបានតំាងលក់រថយន្តរបស់ខ្លួននៅលើទ្រូងផ្លូវ និងចិញ្ចើមផ្លូវសាធារណៈ ក្នុងមូលដ្ឋានខណ្ឌដូនពេញ ដែលនាំឲ្យបាត់បង់សោភ័ណភាព សណ្តាប់ធ្នាប់ទីក្រុង និងនាំឲ្យកកស្ទះចរាចរណ៍។
 

ដើម្បីរក្សាសណ្តាប់ធ្នាប់ និងរបៀបរៀបរយសាធារណៈ អភិបាលខណ្ឌដូនពេញ ស្នើឲ្យម្ចាស់រថយន្ត បញ្ឈប់ការតាំងលក់រថយន្តរបស់ខ្លួន និងចតរថយន្តនៅតាមចិញ្ចើមផ្លូវសាធារណៈ។ តាមសេចក្តីជូនដំណឹងរបស់រដ្ឋបាលខណ្ឌដូនពេញ ម្ចាស់រថយន្តទាំងនោះ មានរយៈពេលត្រឹមថ្ងៃទី១២ មិថុនា ដើម្បីយករថយន្តទាំងអស់នោះចេញពីចិញ្ចើមផ្លូវសាធារណៈ ។ ក្នុងករណីម្ចាស់រថយន្ត ឬអ្នកលក់រថយន្តមិនគោរពតាមសេចក្តីជូនដំណឹង និងការណែនាំរបស់អភិបាលខណ្ឌទេ រដ្ឋបាលខណ្ឌដូនពេញនឹងចុះអនុវត្តវិធានការរដ្ឋបាល ហើយមិនទទួលខុសត្រូវរាល់ការខូចខាតបាត់បង់ទ្រព្យសម្បត្តិឡើយ៕