ជាតិ
សង្គមជាតិ
សម្ដេច ហ៊ុន សែន៖ ពេញមួយជីវិត ទេវនាដនិម្មិត ឯម ធ្ធាយ បានលះបង់ពេលវេលាលើកស្ទួយវប្បធម៌ជាតិ
× ភ្នំពេញ៖ សម្ដេច ហ៊ុន សែន បានផ្ញើសាររំលែកទុក្ខលោកស្រី ថោង គឹមអាន កូនស្រីទេវនាដនិម្មិត ឯម ធ្ធាយ ។ ទេវនាដនិម្មិត ឯម ធ្ធាយ បានទទួលមរណភាពក្នុងជន្មាយុ៨៨ឆ្នាំ ដោយជរាពាធ នៅថ្ងៃទី១៥ មិថុនានេះ។
ប្រមុខរដ្ឋាភិបាល ចាត់ទុកមរណភាពទេវនាដនិម្មិត ឯម ធ្ធាយ ជាការបាត់បង់ព្រឹទ្ធាចារ្យសិល្បការិនីដ៏ឆ្នើម ដែលជាមរតកមនុស្សរស់ដ៏មានតម្លៃបំផុត នៃរបាំព្រះរាជទ្រព្យ។ «ពេញមួយជីវិតរបស់គាត់ ឧបាសិកាព្រឹទ្ធាចារ្យ ទេវនាដនិម្មិត បានលះបង់ពេលវេលាដ៏មានតម្លៃ រួមចំណេកលើកស្ទួយនិងថែរក្សាវប្បធម៌ដ៏រុងរឿងរបស់ជាតិយើង»។ នេះជាការបញ្ជាក់របស់សម្ដេច ហ៊ុន សែន។
ព្រឹទ្ធាចារ្យ ជានាដការបាំព្រះរាជទ្រព្យឬរបាំក្បាច់ខ្មែរបុរាណ ដោយបានខិតខំប្រឹងប្រែងចែករំលែកចំណេះដឹង ក៏ដូចជាខំបង្រៀនរបាំបុរាណដល់ក្មេងជំនាន់ក្រោយ។ ព្រឹទ្ធាចារ្យ ឯម ធាយ អាចរាំរបាំតួនាង តួនាយរោង ក្បាច់ប្លែង តួស្វា តួយក្ខ ច្រៀង និងដឹកនាំបង្ហាត់ក្នុងរឿង។
ព្រឹទ្ធាចារ្យ ឯម ធាយ បានបង្រៀនសិស្សរបាំបុរាណក្នុងព្រះបរមរាជវាំង តាំងពីអាយុ១៩ឆ្នាំ និងបង្ហាត់ក្នុងនាយកដ្ឋានសិល្បៈ រហូតដល់ចូលនិវត្តន៍។ ព្រឹទ្ធាចារ្យ ឯម ធាយ គឺជាសិស្សរបាំព្រះរាជទ្រព្យ របស់ព្រះមហាក្សត្រយានី ស៊ីសុវត្ថិកុសុមៈនារីរត្ន សេរីវឌ្ឍនា៕
Tag:
ឯម ធ្ធាយ
ហ៊ុន សែន
© រក្សាសិទ្ធិដោយ thmeythmey.com